Máskeýdegi lańkestik sheteldik qoldaýmen júzege asyrylýy yqtımal - S.Lavrov
ASTANA. Naýryzdyń 30-y. QazAqparat - RF Syrtqy ister mınıstri Sergeı Lavrov, dúısenbi kúni tańerteń Máskeý metrosynda ondaǵan adamnyń ómirin qıǵan lańkestik árekettiń shetelden jasalǵan qoldaýdyń kómegimen bolýy yqtımal ekenin joqqa shyǵarmaıdy.
«Men osyndaı jaǵdaıdy joqqa shyǵarmaımyn, eshteńeni joqqa shyǵarýǵa bolmaıdy», dep málim etti S.Lavrov jýrnalısterdiń saýaldaryna bergen jaýabynda.
Mınıstrdiń aıtýynsha, «Pákistan men Aýǵanstannyń shekarasynda eshjaqqa baǵynbaıtyn aýmaqtyń bar ekenin» Máskeý jaqsy biledi. Osy aýmaqta «lańkester bekinip alǵan», dedi mınıstr óz sózinde.
«Tek Aýǵanstandaǵy ǵana emes, basqa da elderde jasalyp jatqan kóptegen lańkestik áreketterdiń sol jerde oılastyrylatynyn biz bilemiz... Keıde ol baǵyttar Kavkazǵa da aparady», deıdi S.Lavrov. Mınıstrdiń atap kórsetýinshe, osynyń bári «lańkestikpen kúres jónindegi kúsh-jigerdi úılestirýdiń mańyzdylyǵyn taǵy da qýattap otyr».
