Máskeýdegi klınıkada ekpe jasalǵan toǵyz adam soqyr bolyp qaldy
ASTANA. QazAqparat - Reseıdiń densaýlyq saqtaýdy qadaǵalaý mekemesi «Avastın» preparatynan keıin toǵyz adam zaǵıp bolyp qalǵan Gelmgolts atyndaǵy kóz aýrýlary ǵylymı-zertteý ınstıtýtyn tekserý jumystaryn bastady, dep habarlaıdy RIA Novostı.
ǴZI tekserý jumystary klınıkadan zardap shekken patsıentter týraly BAQ-ta jarııalanǵan soń, RF Densaýlyq saqtaý mınıstri tapsyrmasymen júrip jatyr. Bul týraly Reseı Densaýlyq saqtaý mınıstrligi qoǵamdyq densaýlyq jáne baılanys departamentiniń dırektory Oleg Salagaı aıtyp berdi.
Oleg Salagaı: «Gelmgolts atyndaǵy kóz aýrýlary ǴZI «Avastın» preparatyn qabyldap aýrýy asqynǵan patsıentter týraly aqparat jarııalanysymen, RF densaýlyq saqtaý mınıstri densaýlyq saqtaý salasyndaǵy qadaǵalaý boıynsha Federaldy qyzmetke tekserý júrgizý týraly tapsyrma berdi».
BAQ-ta Gelmgolts atyndaǵy kóz aýrýlary ǵylymı-zertteý ınstıtýtynda «Avastın» preparatyn qabyldap, toǵyz adamnyń kórý qabiletinen aıyrylǵany belgili boldy. BAQ málimetteri boıynsha, «Avastın» kózdiń tor qabyǵyn sharbylanýdan saqtaıdy.
«Avastın» - sheteldik dáriniń reseılik balamasy. Máskeý men Sankt-Peterborda ǵana bul preparat egiledi. Sondyqtan, zardap shekkenderdiń kópshiligi reseılik aımaqtardyń turǵyndary.
Aldyn ala boljam boıynsha, dári ampýlalarynda qaýipti ınfektsııa bolýy múmkin.
