Máskeýdegi Ka-52 tikushaǵynyń apaty boıynsha is qozǵaldy
ASTANA. 30 qazan. QazAqparat - Keshe Máskeýdiń ońtústik-shyǵysynda Ka-52 tikushaǵy apatty bolǵannan keıin qaýipsizdik erejeleri buzylǵandyǵy jóninde is qozǵaldy.
Qozǵalǵan qylmystyq is «Qozǵalys qaýipsizdigi jáne áýe kóligin paıdalaný erejelerin buzý saldarynan iri kólemde zalal keltirý» baby boıynsha «Allıgator» Ka-52 tikushaǵynyń apattyq qonýy faktisine negizdelip otyr.
Sheteldik BAQ málimetine qaraǵanda, áýe kóliginiń menshik ıesi Qorǵanys mınıstrligine 800 mln. rýbl kóleminde shyǵyn keltirilgen.
Aıta keteıik, seısenbide Máskeýdiń ońtústik-shyǵysyndaǵy Jýlebıno aýdanynda ushý synaqtary kezinde jaýyngerlik jańa «Allıgator» Ka-52 tikushaǵy apatqa ushyrady. Ondaǵy eki ushqysh ta aýrýhanaǵa jetkizildi.
