Máskeýdegi Ábilıazov soty: «BTA Bankinen» qarjyny jymqyrý shemasy aıtyldy
Qylmystyq is boıynsha sondaı-aq sybaılas retindegi RF-dan ketip qalǵan tórt azamat - I.V. Kononko, T.N. Paraskevıch, A.V. Ereşenko jáne A.A. Ýdovenkonyń isi qaralýda.
Memlekettik aıyptaýshy aıyptaý qorytyndysyn 1 saǵat 40 mınýt oqydy. Aıyptaý tarapynyń málimetinshe, M.Ábilázov qurǵan uıymdasqan qylmystyq top «BTA Banki» AQ-tyń aqshasyn urlaý isimen aınalysqan. Birneshe epızod boıynsha negizgi shema - qazaqstandyq banktiń shoty esebinen jalǵan zańdy tulǵalardy nesıeleý bolyp otyr. Olardyń ishinde iri jer ýchaskeleri men jyljymaıtyn múliktiń ártúrli nysandaryn alýǵa, kólik-logıstıkalyq ortalyqtardyń, saýda-oıyn-saýyq jáne qonaqúı keshenderiniń qurylysyn júrgizýge qatysty faktter bar.
«Osylaısha, Muhtar Ábilıazovqa RF Qylmystyq kodeksiniń 159-baby 4-bóligi (alaıaqtyq), 174-baby 3-bóligi (basqa adamnyń atynan qylmystyq jolmen aqshany jymqyrý), 201-baby 2-bóligi (qyzmetin teris paıdalaný), 165-baby 2-bóligi a, b tarmaqtary boıynsha (Aldaý nemese senimge kirý arqyly múliktik zııan keltirý) 9 qylmysqa qatysty aıyp taǵylyp otyr», - dedi memlekettik aıyptaýshy.
Tyńdaýdan keıin sot kelesi otyrysty osy jyldyń 10 aqpanyna aýystyrý týraly qaýly shyǵardy. Bul ýaqyt taraptardyń óz dálelin, kýágerlik túsinikterin jáne iske qatysty ózge de materıaldardy ákelýi úshin berilip otyr.
Eske sala ketsek, Muhtar Ábilázov men taǵy tórt azamat - I.V. Kononko, T.N. Paraskevıch, A.V. Ereşenko jáne A.A. Ýdovenkoǵa qatysty is Tagan aýdandyq sotyna 2019 jyldyń jeltoqsanynda kelip túsken bolatyn.
Muhtar Ábilázovtyń qorǵaýyn memleket atynan advokat júrgizip jatyr. Sonymen birge, protseske Máskeý qalasynyń advokattyq keńsesiniń ókilderi qatysýda.
BTA Banki – zardap shekkenderdiń múddesin de reseılik advokattar qorǵaýda.
Aıta ketsek, 2018 jyldyń naýryzynda QR Bas prokýratýrasynyń ókilderi OKQ-da Muhtar Ábilázovqa qatysty málimdeme jasap, «Qazaqstannyń demokratııalyq tańdaýy» ekstremıstik uıym dep tanylǵanyn jarııalaǵan edi.
«Bas prokýratýra sot sheshimimen keıin «Qazaqstannyń demokratııalyq tańdaýy» ekstremıstik uıymynyń áreketine qatysqany jáne qarjylandyrǵany úshin Qylmystyq kodekstiń 182, 258 jáne 405 baptaryna sáıkes qylmystyq jaýapkershilik kózdelgen. Qatysý áreketine, qozǵalystyń ıdeıasyn nasıhattaý, onyń jarııalanymdaryn, paraqshalaryn, posttaryn jáne pikirlerin, basqa da aqparattyq materıaldaryn daıyndaý, shyǵarý, kóbeıtý jáne taratý jatady. Sonymen qatar, qatysý bolyp qozǵalysty jáne onyń basshysy Ábilázovty qoldaýǵa mıtıngterdi, sherýlerdi, jarııa aktsııalaryn jáne basqa jappaı is-sharalardy uıymdastyrý, ótkizý sanalady. Qarjylandyrý uǵymyna Ábilázovpen qozǵalysqa aqshany, ózge múlikti berý nemese jınaý, syıǵa tartý, aıyrbastaý, qaıyrymdyq jasaý, sponsorlyq jáne qaıyrymdylyq kómek, aqparattyq jáne ózge de qyzmetterdi kórsetý jatady. Sonymen qatar, istegi zańnamaǵa sáıkes, ekstremıstik toptyń áreketine qatysýdy óz erkimen toqtatqan adam qylmystyq jaýaptylyqtan bosatylady», - delingen málimdeme.