Máskeýde Jeńis kúnine oraı áskerı sherý ótip jatyr
Sherýdi ortalyq minberden soǵys ardagerleri, batyrlyq áreketter jasaǵan azamattar men sheteldik qonaqtar tamashalap otyr.
Sherýdi Qurlyq áskerleri bas qolbasshysy, armııa generaly Oleg Salıýkov basqarýda, qabyldap alýshy – RF Qorǵanys mınıstri, armııa generaly Sergeı Shoıgý.
«Bizdiń qurmetti ardagerler, sizderdiń qaısarlyǵyńyz ben rýhtaryńyzdyń myqtylyǵy úshin bas ıemiz. Otanǵa degen ólmeıtin mahabbat pen birlik úlgisin kórsetkenderińiz úshin alǵys aıtamyz. Sizder tek birikkende ǵana kóp nársege jetýge bolatynyn dáleldedińizder. Qatygez jaýdy eńserip, óz úılerińizdi, balalaryńyz ben týǵan elińizdi qorǵap qaldyńyzdar. Natsızmdi sózsiz jeńip, 1945 jyldyń 9 mamyryn ǵasyrlarǵa madaq ettińizder», - dedi RF prezıdenti Vladımır Pýtın Qyzyl alańdaǵy minberden EDS ardagerlerine.
«Bul uly erlikti keńes halqy jasaǵanyn eshqashan esten shyǵarmaımyz», - dedi V. Pýtın. – Jeńimpaz halyq jasasyn! Meıramdaryńyzben, Uly Jeńis kúnimen! Ýra!»
Qyzyl alańdaǵy saltanatty sherýge 12 myńnan asa áskerıler, 37 jaıaý sherý jasaýshylar men 19 zamanaýı jáne perspektıvti, sonymen qatar tarıhı áskerı tehnıka birlikteri qatysty.
Mehanıkalandyrylǵan tehnıka ótkennen keıin Reseı áýe-ǵarysh kúshteriniń 76 ushaǵy men tikushaǵy Qyzyl alań tóbesinen ushpaq.
Osy kúni Jeńistiń 76 jyldyǵyna arnalǵan sherýler Reseıdiń taǵy 28 qalasynda, onyń ishinde 9 batyr qalada ótkizilýde. Saltanatty sharalar keshke merekelik otshashýmen aıaqtalmaq.
Epıdemıologııalyq ahýalǵa baıylanysty el bıligi sanıtarııalyq talaptardy saqtaý boıynsha qosymsha sharalar qabyldaýda – áleýmettik qashyqtyqty jáne maska-qolǵap rejımin saqtaý úshin jaǵdaı jasalǵan.
