Máskeýde jarylǵysh zat týraly habarlamalar qaıta túse bastady
ASTANA. QazAqparat - Jeksenbi kúni Máskeýdiń shuǵyl qyzmetterine jarylǵysh zattar týraly túsken habarlamalardan keıin qalanyń saýda úılerinen 5 myńnan astam adam evakýatsııalandy. Bul týraly TASS agenttigi quqyq qorǵaý organdaryndaǵy derekkózge silteme jasap habarlady.
«Shuǵyl qyzmetter jarylys qaýpi týraly habarlamalardyń túsýine baılanysty Kalýjskıı tasjolyndaǵy "Mega Teplyı Stan" saýda ortalyǵyn tekserýde. Bul búgindikke Máskeýde evakýatsııalanǵan tórtinshi saýda ortalyǵy. Barlyǵy bes myńnan astam adam qaýipsiz jerge shyǵaryldy», - dep málimdedi agenttiktiń suhbattasy.
Onyń aldynda, jeksenbi kúni keshqurym Máskeýde taǵy úsh saýda ortalyǵynan - Horoshevskıı tasjolyndaǵy «Horosho!», Kýtýzovskıı dańǵylyndaǵy «Okeanııa» jáne Manej alańyndaǵy «Ohotnyı rıad»-tan adamdar qaýipsiz aýmaqqa kóshirildi.
Eske salaıyq, jarylys týraly osyndaı qońyraýlarǵa sáıkes, 14 qyrkúıek kúni Máskeýdiń saýda ortalyqtarynan , vokzaldary men joǵary oqý oryndarynan, sondaı-aq birneshe qonaqúıinen 20 myńnan astam adam qaýipsiz jerlerge kóshirilgen bolatyn.
