Máskeýde jańa derekterdi óńdeý ortalyqtary úshin elektr qýaty jetispeıdi

MÁSKEÝ.KAZINFORM — Reseıdik elektr jelileri kompanııalary Máskeýdegi jańa derekterdi óńdeý ortalyqtaryn (DOO) elektr jelilerine qosýdan bas tarta bastady, sebebi astanada olarǵa arnalǵan qýat jetkiliksiz. 

Qoldanystaǵy qýat kólemderi qazirdiń ózinde paıdalanylyp jatyr nemese 2028 jylǵa deıin iri oıynshylar úshin ǵana qarastyrylǵan. Reseı BAQ-tary «Vedomostı» derekkózine silteme jasap, agenttik tilshisi habarlaıdy.

Máskeýde qoljetimdi elektr energııasynyń kólemin tez arada ulǵaıtý múmkin emes ekeni atap ótildi.

Úkimettiń № 861 qaýlysy jetkilikti elektr energııasynyń joqtyǵynda jetkizýshi tutynýshyǵa tómen qýat usyna alatyndyǵyn kózdeıdi. Biraq DOO úshin bul nusqa jaramaıdy.

Energetıka salasynyń sarapshysy Dmıtrıı Stapran Máskeý óńirinde jańa DOO-lardy ornalastyrýdyń odan ári damý áleýeti shekteýli ekenin atap ótti. Máskeýde jáne Máskeý oblysynda jańa elektr stantsııalaryn 2027-2030 jyldary iske qosý josparlanyp, jańa joǵary voltti elektr jelilerin salý tek 2030-2032 jyldary júzege asyrylady.

Sarapshynyń pikirinshe, orta merzimdi perspektıvada óńirde DOO-lardy jelilerge qosýdaǵy shekteýlerdi alyp tastaý is júzinde múmkin emes.

Vladımır oblysy gýbernatorynyń keńesshisi Ahmetjan Mahmýtov Máskeýde elektr energııasynyń tapshylyǵy sebepti jańa DOO-lardy salý Ekaterınbýrg, Novosıbırsk, Qazan, Samara, Tómengi Novgorod jáne Rostov-na-Doný sııaqty óńirlerge kóshiriletinin málimdedi. Ol qazirgi ýaqytta DOO-lardy qosý eń arzan Sibirde júzege asyrylatynyn qosty.

Selectel kompanııasynyń derekter ortalyqtary baǵytynyń dırektory Ilıa Mıhaılov óńirlerde bos resýrstar kóbirek, biraq suranys tómen bolǵandyqtan, ınfraqurylymnyń olarǵa jappaı kóshirilýi bolyp jatpaıtynyn málimdedi. Cloud.ru kompanııasynyń strategııa jáne taldaý dırektory Andreı Proshletsovtyń aıtýynsha, iri kompanııalarǵa DOO-lardy óńirlerde salý tıimsiz, sebebi negizgi paıdalanýshylar Máskeýde jáne Máskeý oblysynda shoǵyrlanǵan.

30 qazanda Tsıfrlandyrý mınıstrligi men úkimettik taldaý ortalyǵynyń ókilderi Vıtse-premer Aleksandr Novaktyń otyrysynda 2030 jylǵa qaraı Reseıdegi jasandy ıntellekt úshin arnalǵan DOO-lardyń elektr energııasyn tutynýy qazirgi 1 GVt-tan keminde 2,5 esege — 2,5 GVt-qa deıin ósetinin habarlady.

DOO-lardyń bolashaq qajettilikterin qamtamasyz etý úshin úkimette elektrmen jabdyqtaý strategııasyn ázirleý bastaldy. Energetıka mınıstrliginiń basshylyǵymen jumysshy top quryldy. 

Aıta ketelik Reseıde meteorıtti zańsyz alyp shyǵý áreketi toqtatylǵan edi.