Máskeýde vokzaldar, JOO-lar men qonaqúılerden adamdar jappaı evakýatsııalandy
ASTANA. QazAqparat - Jarylys týraly habarlamalarǵa sáıkes, Máskeýdiń saýda ortalyqtarynan, vokzaldary men joǵary oqý oryndarynan, sondaı-aq birneshe qonaqúıinen 20 myńnan astam adam qaýipsiz jerlerge kóshirildi. Bul týraly TASS agenttigine shuǵyl qyzmetterden habarlady.
«Jarylys qaýpi týraly habarlamalardan keıin kem degende 30 nysanda evakýatsııa júrgizildi. Jalpy 20 myńnan astam adam qaýipsiz jerge shyǵaryldy», - dep málim etken agenttiktiń suhbattasy, jarylys bolýy múmkindigi týraly qońyraýlar áli de túsip jatqandyǵyn aıtty.
Jarylǵysh zat qoıylǵandyǵy týraly qońyraýlar negizinen saýda ortalyqtaryna qatysty bolyp otyr. Olardyń arasynda «Mıtınskıı radıobazary, «Afımoll sıtı», «Şelkovo», «Metropolıs», «Festıval», «Varshavskıı», Memlekettik ýnıvermag, «Kojevnıkı» jáne basqalary bar.
Onymen qosa, Sechenov atyndaǵy medıtsına ýnıversıtetinen, Ádilet mınıstrliginiń Reseı quqyq akademııasynan jáne Máskeý memlekettik halyqaralyq qatynastar ınstıtýtynan adamdar shyǵaryldy.
Evakýatsııa sondaı-aq VDNH aýdanyndaǵy «Kosmos» jáne «Zvezdnaıa» qonaqúılerinde jáne Olımpııskıı dańǵylyndaǵy «Azımýt otelde» júrgizildi.
Agenttik suhbattasynyń aıtýynsha, kem degende bes nysan tekserildi, jarylys týraly habarlamalar jalǵan bolyp shyqty. Bombany izdeý jumystary Kazanskıı jáne Kıevskıı vokzaldarynda, Ádilet mınıstrliginiń Reseı quqyq akademııasynda jáne «Gorod» saýda ortalyǵynda júrgizildi.
