Máskeýde úıiniń terezesinen oq jaýdyrǵan kúdikti aýrýhanada kóz jumdy
MÁSKEÝ. TASS-QazAqparat – Máskeýdiń ońtústik-batysynda páter terezesinen oq jaýdyrǵan er adam ustaý kezinde jaralanyp, aýrýhanada qaıtys boldy. Bul týraly Máskeýdiń Tergeý komıteti bas tergeý basqarmasynyń ókili ıÝlııa Ivanova málim etti, dep habarlaıdy QazAqparat TASS agenttigine silteme jasap.
«Medıtsınalyq kómek kórsetken dárigerlerdiń jumsaǵan kúsh-jigerine qaramastan kúdikti qaıtys boldy», - dedi ol.
1969 jyly týǵan Dmıtrıı Pavlov 7 maýsym keshke Qurylysshylar kóshesindegi páterdiń terezesinen karabınnen oq atqan. Ustaý kezinde ol arnaıy bólimshe qyzmetkerlerine qarsylyq kórsetip, jaralanǵan.
Buǵan deıin quqyq qorǵaý organdaryndaǵy derekkózde dárigerler ustalǵan adamǵa ota jasalatynyn habarlaǵan bolatyn.
«Qylmys sebepterin anyqtaý úshin oǵan ólgennen keıingi psıhologııalyq-psıhıatrııalyq saraptama júrgiziledi», - dep habarlady quqyq qorǵaý organdary.
Agenttiktiń habarlaýynsha, kórshileri aıtqandaı, er adamnyń jaǵdaıy qıyn bolýy múmkin, biraz ýaqyt buryn áıelimen ajyrasqan eken.
Marqumnyń úıinen ishimdik men «Fenıbýt» nootropty preparaty tabylǵan.
«Kúdikti turyp jatqan páterdi tekserý kezinde nootropty zat pen bos ishimdik bótelkeleri tabyldy», - dedi ıÝlııa Ivanova.
Atys kezinde úıdiń janynan ótip bara jatqan eki adam jaraqat alǵan.
«Er adam aýrýhanaǵa jetkizildi, áıel adam tekserilip, úıine jiberildi, onyń ómiri men densaýlyǵyna esh qaýip tónip turǵan joq», - dedi Bas tergeý basqarmasynyń ókili.
Arnaıy jasaq qyzmetkeri kúdiktini ustaý kezinde jeńil jaraqat aldy.
