Máskeýde ushaqty basyp alǵan adamda eki eldiń de azamattyǵy bolǵan
ASTANA. Tamyzdyń 6-sy. QazAqparat /Rýslan Ǵabbasov/ - Reseıdegi Qazaqstan Elshiligi Magomed Patıevtiń jeke kýáliginiń kóshirmesin aldy. Atalǵan qujattyń kóshirmesi boıynsha ol Qazaqstan azamaty bolyp shyqty.
Bul týraly búgin Astanada ótken brıfıngte QR Syrtqy ister mınıstrliginiń resmı ókili Asqar Ábdirahmanov málimdedi.
Esterińizge sala keteıik, taıaýda Mıneralnye Vody qalasynan Máskeýge ushyp kelgen ushaqty M. Patıev esimdi azamat tarapynan basyp alý áreketi oryn alǵan bolatyn. M.Patıev ashyq qoqan-loqy jasamaǵanymen, biraq ol tártip saqshylaryna asyǵys áreketter jasamaýdy eskertken.
Kenet jolaýshylardyń biriniń densaýlyq jaǵdaıy nasharlap, oǵan kómek kórsetý úshin ushaq bortyna dáriger kıimimen kóterilgen eki tártip saqshysy qaskóıdi ustap, adamdardy bosatty. Oqıǵa saldarynan eshkim zardap shekken joq. Tekserý kezinde odan eshqandaı qarý tabylmaǵan. Qazir qylmystyq is qozǵaý máselesi sheshilip jatyr.
Jolaýshylar ushaǵyn basyp alǵan álgi azamat V.Pýtınmen kezdesýdi talap etip, qolynda RF Premerine tabys etetin «Sheshenstan Respýblıkasy týraly mańyzdy qujattar» bar ekenin málim etken. 105 adamdy kepildikke alǵan álgi qaskóıdiń kim ekendigi anyqtaldy. Ol 1970 jyly týǵan Magomed Patıev degen azamat bolyp shyqty.
«Qazirgi kezde onda sonymen qatar reseılik tólqujattyń bary anyqtaldy. Osyǵan sáıkes, bul qaıshylyq sheshilýi tıis. Qazaqstan Respýblıkasynyń zańynda eki eldiń azamattyǵyn alýǵa tyıym salynǵan», - dedi resmı ókil.
