Máskeýde Ulttyq baspasóz klýbynyń vıtse-prezıdenti Aleksandr Kımasov qaıtys boldy

Bul týraly búgin «QazAqparat» tilshisine Ulttyq baspasóz klýbynyń atqarýshy dırektory Erlan Ramazanov habarlady.

«Aleksandr Kımasov osydan eki jyl buryn Máskeýge kóship ketken bolatyn. Búgin bizge onyń uly habarlasyp, ákesiniń dúnıe salǵandyǵyn aıtty. Aleksandr Kımasov sońǵy kezderi aýyryp júrgen bolatyn. Taıaýda 79 jasqa tolǵan edi. Marqumdy aqtyq saparǵa shyǵaryp salý rásiminiń ýaqyty keıinirek belgili bolady», - dedi E. Ramazanov.

Aleksandr Maksımovıch Kımasov 1936 jyly 15 tamyzda Shyǵys Qazaqstan oblysy Shemonaıha aýdanynyń Vydrıha aýylynda týǵan. Óskemen pedagogıka ınstıtýtyn bitirgen. Mamandyǵy - orys tili, ádebıeti jáne tarıhynyń muǵalimi. Eńbek jolyn Lenınagor polımetall kombınatynda burǵy sheberi bolyp bastaǵan. Instıtýtty tamamdaǵan soń aýyl mektebinde muǵalim bolyp eńbek etti.

1991 jyldan A. Kımasov - Qazaqstan Prezıdenti baspasóz qyzmetiniń konsýltanty. 1997 jyldan - Ulttyq baspasóz klýbynyń vıtse-prezıdenti. 2008 jyly ol halyqaralyq «QazTAG» aqparattyq agenttiginiń bas dırektory bolyp taǵaıyndaldy. A. Kımasov birqatar memlekettik marapattarǵa ıe. Ol «Qazaqstanyń qurmetti jýrnalısi» ataǵyn alǵan jáne Qazaqstannyń Jýrnalıster odaǵy júldesiniń laýreaty.