Máskeýde túrki mádenıeti kórinis tapqan «Stanıslavskıı/Chehov» spektakli kórsetildi – sheteldegi qazaq baspasózi

Iran EAEO elderimen ekonomıkalyq áriptestikti keńeıtpek – Eurasia Today

Iran Eýrazııalyq ekonomıkalyq odaqty (EAEO) óńirlik yntymaqtastyqty damytýdaǵy mańyzdy platformalardyń biri retinde qarastyrady. Bul týraly Irannyń birinshi vıtse-prezıdenti Mohammad Reza Aref málimdedi.

Bul týraly osy aptada Qyrǵyzstanda shyǵatyn Eurasia Today aqparat agenttigi habarlady. 

Atalǵan BAQ-tyń keltirgen derekterine súıensek, onyń aıtýynsha, Tegeran EAEO-nyń saýda jáne ınvestıtsııalyq áleýetin tolyq paıdalanýǵa múddeli. 2025 jylǵy mamyrda Iran men EAEO arasynda erkin saýda týraly kelisimniń jasalýy ekonomıkalyq baılanystardy keńeıtýge jańa múmkindik bergen.

Mohammad Reza Aref Irannyń EAEO elderimen uzaq merzimdi áriptestikti jalǵastyrýǵa daıyn ekenin atap ótti. Tegeran energetıka jáne logıstıka salalaryndaǵy birlesken jobalarǵa basymdyq bermek.

Onyń pikirinshe, Irannyń geografııalyq ornalasýy Azııa men Eýropa arasyndaǵy saýda joldarynda mańyzdy tranzıttik býyn bolýǵa múmkindik beredi.

Sondaı-aq osy aptada Eurasia Today basylymynda «Qazaqstan men Aýǵanstan óńiraralyq yntymaqtastyqty damytý máselelerin talqylady» degen taqyryptaǵy aqparat jaryq kórgenin aıta ketý kerek.

Gerat qalasynda Qazaqstan men Aýǵanstan óńirleri arasyndaǵy saýda-ekonomıkalyq jáne óńiraralyq yntymaqtastyqty damytý máseleleri talqylandy. Eýrazııa Týdeıdiń QR Syrtqy ister mınıstrliginiń baspasóz ortalyǵyna silteme jasap habarlaýynsha, Qazaqstan Prezıdentiniń Aýǵanstan boıynsha arnaıy ókili Erkin Tuqymov bastaǵan delegatsııa Gerat provıntsııasynyń gýbernatory Nýr Ahmad Islamjarmen kezdesti. Taraptar saýda, ónerkásiptik kooperatsııa, kólik jáne logıstıka salalaryndaǵy baılanystardy keńeıtýge baǵyttalǵan «West2West» formatyn damytýǵa nazar aýdardy. Sapar aıasynda «Qazaqstan–Aýǵanstan: óńiraralyq yntymaqtastyq» bıznes-forýmy ótip, ózara saýda men iskerlik baılanystardy arttyrý máseleleri qaraldy. Sonymen qatar qazaqstandyq «Integra Construction KZ» kompanııasy qurylysyna qatysqan «Haf – Gerat» temirjolynyń úshinshi ýchaskesi ashyldy. 2026 jylǵy qańtar-shildede eki el arasyndaǵy taýar aınalymy 581,1 mln dollardy qurap, bir jylda 2,4 ese ósti.

Qazaqstan men Ózbekstan týrıstik almasýdy keńeıtý máselelerin talqylady– ÓzA

Dýshanbe qalasynda Ózbekstan Týrızm komıteti delegatsııasynyń TMD elderi ókilderimen jáne týrızm salasyndaǵy halyqaralyq jobalar jetekshilerimen kezdesýleri ótti.

Atap aıtqanda, Ózbekstandyq komıtet tóraǵasynyń orynbasary Sanjar Tojıev Qazaqstan Týrızm jáne sport mınıstrligi Týrızm ındýstrııasy komıtetiniń tóraǵasy Nurbol Baıjanovpen kezdesip, eki el arasyndaǵy týrıstik almasýdy keńeıtý, óńiraralyq jáne shekara mańy týrızmin damytý, sondaı-aq Ortalyq Azııany biryńǵaı týrıstik baǵyt retinde úshinshi elderdiń naryqtarynda birlesip ilgeriletý máselelerin talqylady, dep habarlaıdy «ÓzA» aqparat agenttigi. 

Habarlamada aıtylýynsha, kezdesýde birlesken tanystyrylymdar, týrıstik forýmdar men aqparattyq týrlar uıymdastyrý, sondaı-aq Qazaqstannyń Túrkistan, Qyzylorda jáne Mańǵystaý oblystary men Ózbekstan óńirleri arasynda demalys kúnderine arnalǵan baǵyttardy damytý perspektıvalary qarastyryldy. Qazaqstan tarabyna 25-27 qarashada Tashkentte ótetin «Jibek jolyndaǵy týrızm» 31-shi Tashkent halyqaralyq týrızm jármeńkesine ulttyq stendpen qatysý usynyldy. Taraptar týrıstik almasýdy keńeıtý jáne birlesken jobalardy júzege asyrý baǵytyndaǵy yntymaqtastyqty jalǵastyrýǵa ýaǵdalasty.

Sondaı-aq ótken aptanyń sońynda «ÓzA»-da «Almatyda «Qambarata GES-1» jobasy boıynsha kelissózder ótti» degen taqyryptaǵy aqparat jarııalanǵanyn aıta ketýimiz kerek.

Atalǵan aqparat kóziniń dereginshe, 21-23 qyrkúıekte Almatyda Qazaqstan, Ózbekstan jáne Qyrǵyzstannyń energetıka, sý sharýashylyǵy jáne syrtqy ister salalaryna jaýapty memlekettik organdarynyń ókilderi «Qambarata GES-1» jobasyn birlesip júzege asyrý máselelerin talqylady. Kezdesýde gıdroelektr stantsııasyn birlesip iske asyrý jáne basqarý, qarjylandyrý, taraptardyń mindettemeleri men yntymaqtastyqty úılestirý tetikteri qaraldy. Kelissózderge Dúnıejúzilik bank ókilderi baqylaýshy retinde qatysyp, úkimetaralyq kelisim jobasyn ázirleýge tehnıkalyq qoldaý kórsetti. Taraptar jobany iske asyrýdyń negizgi tetikterin naqtylap, Ortalyq Azııadaǵy sý-energetıkalyq yntymaqtastyqty odan ári damytýǵa nıetti ekenin bildirdi.

Toqaev: Qazaqstan men Qytaı arasyndaǵy yntymaqtastyq jan-jaqty damý qarqynyn kórsetti– «Halyq gazeti»

Qazaqstan Prezıdenti Qasym-Jomart Toqaev 25 qyrkúıekte ótken alǵashqy Qazaqstan-Qytaı ınvestıtsııalyq forýmynyń ashylýynda eki el arasyndaǵy turaqty jan-jaqty strategııalyq seriktestiktiń berik negizge súıenetinin atap ótti.

Onyń aıtýynsha, ónerkásip, tsıfrlandyrý, «aqyldy qalalar», spýtnıktik tehnologııalar, aýyl sharýashylyǵy, densaýlyq saqtaý jáne bilim berý salalaryndaǵy yntymaqtastyq qarqyndy damyp keledi.

Bul týraly osy aptanyń basynda qytaılyq Halyq gazeti basylymy habarlady. 

Memleket basshysy Qazaqstannyń ınvestıtsııa tartý men iri jobalardy júzege asyrýǵa qolaıly jaǵdaı jasap otyrǵanyn aıtty.

Atalǵan BAQ-tyń málimetine súıensek, forýmǵa eki eldiń bıznes ókilderi, memlekettik qyzmetkerleri men damý ınstıtýttarynyń basshylarynan shamamen 600 adam qatysty. Qytaı Halyqtyq saıası konsýltatıvtik keńesi Turaqty komıtetiniń múshesi Tsaı Gýanshen Qazaqstan men Qytaı arasyndaǵy ekonomıkalyq-saýda baılanystarynyń qurylymy jetilip, ınvestıtsııa kólemi artyp, ózara baılanystylyq jedeldegenin atap ótti. Іs-shara barysynda kólik-logıstıka, ónerkásip pen tereń óńdeý, tsıfrlyq ekonomıka jáne qarjy salalaryndaǵy yntymaqtastyqty damytý máseleleri talqylandy.

Sondaı-aq osy aptada Qytaıdyń Halyq gazetinde «Shanhaıda «Qytaı-Qazaqstan 100 kásibı kolledji» alıansynyń ashylý rásimi ótti» degen taqyryptaǵy aqparat jarııalandy.

Atalǵan basylymnyń keltirgen málimettterine súıensek, 23 qyrkúıekte Shanhaıda Qytaı-Qazaqstan kásibı kolledjderi basshylarynyń forýmy ótip, «Qytaı-Qazaqstan 100 kásibı kolledji» alıansynyń ashylý rásimi ótti. Іs-sharaǵa Qytaı men Qazaqstannyń kásibı kolledjderi, salalyq kásiporyndary jáne bilim berý organdarynan 100-den astam ókil qatysty. Jıyn barysynda oqý oryndary arasynda 100-den astam yntymaqtastyq týraly memorandýmǵa qol qoıyldy.

«Qytaı-Qazaqstan 100 kásibı kolledji» eki eldiń oqý oryndary, mekemeleri men kásiporyndaryn biriktiretin kásibı bilim berý salasyndaǵy kommertsııalyq emes yntymaqtastyq alańyna aınalady. Alıans aıasynda oqý baǵdarlamalaryn birlesip ázirleý, oqytýshylardyń biliktiligin arttyrý, stýdentter almasýyn uıymdastyrý jáne eńbek naryǵynyń qajettiligine saı mamandar daıarlaý baǵyttarynda birlesken jobalardy júzege asyrý josparlanyp otyr.

JI adamǵa túsiniksiz til qoldanyp, alańdaýshylyq týǵyzyp otyr - TRT

AQSh Senatynda ótken tyńdaýda sarapshylar avtonomdy jasandy ıntellekt (JI) agentteriniń baqylaýdan shyǵý qaýpine nazar aýdardy. Apollo Research kompanııasynyń bas dırektory Marıýs Hobbannyń aıtýynsha, keıbir ozyq JI modelderi adamdar tolyq túsine almaıtyn tilde ózara áreket ete bastaǵan.

Ol OpenAI modelin zertteý barysynda onyń aǵylshyn tiline uqsamaıtyn til qalyptastyrǵanyn atap ótti.

Bul týraly osy aptada Túrkııa Radıo Televızııa portaly habarlady. 

«TRT»-nyń dereginshe, tyńdaýda sondaı-aq avtonomdy JI agentteriniń asa mańyzdy ınfraqurylymǵa qaýip tóndirýi múmkin ekeni aıtylyp, tehnologııa ázirleýshilerine quqyqtyq jaýapkershilikti kúsheıtý máselesi kóterildi.

Sarapshylar JI-diń kıbershabýyldarda qoldanylý qaýpi de artyp kele jatqanyn eskertti. Tyńdaýmen qatar jarııalanǵan Quinnipiac ýnıversıtetiniń saýalnamasyna sáıkes, AQSh turǵyndarynyń 73 paıyzy bolashaqtaǵy JI júıeleri adamzatqa qaýip tóndirýi múmkin dep alańdaıdy, al 86 paıyzy táýelsiz qaýipsizdik standarttaryn engizýdi qoldaıdy. Osyǵan baılanysty iri tehnologııalyq kompanııalar JI modelderin qaýipsizdik turǵysynan shekteý sharalaryn qabyldap jatyr.

Sondaı-aq «TRT»-da «Máskeýde túrki mádenıeti kórinis tapqan «Stanıslavskıı/Chehov» spektakli kórsetildi» degen taqyryptaǵy aqparat jaryq kórdi.

Túrkııalyq BAQ-tyń málimetinshe, Máskeýde túrki mádenıetin dáripteıtin «Stanıslavskıı/Chehov» atty teatr qoıylymynyń arnaıy kórsetilimi ótti. Amına Djamannyń shynaıy oqıǵalardan shabyttanyp jazǵan bir aktili fılosofııalyq komedııasy 1928 jylǵy Berlınde túrik dámhanasynda orys teatrynyń kórnekti ókilderi Konstantın Stanıslavskıı men Mıhaıl Chehovtyń kezdesýin arqaý etedi. Qoıylymda olarmen qatar dámhanada jumys isteıtin Gúler esimdi jas túrik qyzynyń beınesi somdalady.

Spektaklde túrik shaıy men kofesi, lýkým, kofe arqyly bal ashý dástúri jáne Ystanbul týraly áńgimeler arqyly túrki mádenıetiniń erekshelikteri kórinis tapqan. Pokrovka teatryndaǵy arnaıy kórsetilim aldynda kórermenderge ebrý óneri tanystyryldy. «Stanıslavskıı/Chehov» spektakliniń resmı premerasy qarasha aıynda ótedi.