Máskeýde taksı kóligi bir top adamdy qaǵyp ketti
MÁSKEÝ. QazAqparat - Máskeýde taksı kóligi bir top adamdy qaǵyp ketti. Saldarynan jeti adam zardap shekti. Bul týraly TASS agenttigi qalanyń shuǵyl qyzmetterine silteme jasap habarlady.
«Ilınka kóshesindegi 4-inshi úıdiń janynda taksı kóligi aldymen jol belgisine soǵylyp, keıin bir top adamdy qaqty. Aldyn ala málimet boıynsha, jeti adam zardap shekti», - dedi agenttiktiń derekkózi.
Jol apatynyń mán-jaıy men zardap shekkenderdiń densaýlyq jaǵdaıy anyqtalý ústinde. Polıtsııa júrgizýshini ustady.
«Aldyn ala boljam boıynsha, júrgizýshi rýlge ıe bola almaı qalǵan. Ol ustalyp, aýmaqtyq polıtsııa bólimshesine jetkizildi. Tekserý júrgizilýde», - dep málim etti ІІM-niń Bas basqarmasynan.
Qalanyń shuǵyl qyzmetindegi derekkóz zardap shekken bes adam aýrýhanaǵa jetkizilgenin aıtty.
Aıta keteıik, osy kúnderi Reseıde fýtboldan 2018 jylǵy Álem chempıonaty ótýde.
Álemdik kil myqty komandalardyń kezdesýi 14 maýsym - 15 shilde aralyǵynda RF-nyń 11 qalasynda, atap aıtqanda, Máskeý, Sankt-Peterbýrg, Qazan, Sochı, Volgograd, Ekaterınbýrg, Kalınıngrad, Nıjnıı Novgorod, Rostov-na-Doný, Samara jáne Saranskide ótedi.
Chempıonatqa álemniń 32 úzdik ulttyq quramalary qatysýda.
