Máskeýde ShYU-nyń halyqaralyq qyzmeti talqylandy
ASTANA. QazAqparat - 2018 jyldyń 9-10 maýsymynda Qytaıdyń Tsındao qalasynda ótken Shanhaı yntymaqtastyq uıymy sammıtiniń qorytyndysy negizindegi halyqaralyq uıymǵa múshe memleketterdiń kóshbasshylarynyń kelisimderin júzege asyrý jumystary aıasynda joǵary deńgeıde konsýltatsııalar ótti.
Atalmysh shara ShYU-nyń halyqaralyq qyzmetine arnaldy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Qazaqstan atynan sharaǵa ShYU máseleleri boıynsha Ulttyq úılestirýshi Erlan Álimbaev qatysty. Qazaqstandyq dıplomat onda halyqaralyq kún tártibindegi máseleler boıynsha, elimizdiń ustanamyn jarııa etti. Sondaı-aq ol sózinde uıymǵa múshe elderdiń basshylarynyń bastamalaryn tolyq ári ýaqytynda júzege asyrý qajettigine nazar aýdardy.
Bul rette dıplomat Qazaqstan Prezıdenti Nursultan Nazarbaevtyń jańa tehnologııalar, ekonomıkany tsıfrlandyrý baǵytynda ShYU aıasyndaǵy tájirıbe almasý alańyn qurý jáne uıymnyń turaqty damý salasyndaǵy birlesken Tujyrymdamasyn daıyndaý jónindegi bastamasynyń da erekshe mańyzdy ekendigin jetkizdi.
Jıynǵa qatysýshylardy Reseı Federatsııasynyń Syrtqy ister mınıstri Sergeı Lavrov qarsy aldy. Ol óz sózinde ShYU-na degen suranystyń álemde ósip kele jatqandyǵyn jáne uıymnyń halyqaralyq jáne óńirlik uıymdarmen strategııalyq baǵyttary nyǵaıyp kele jatqandyǵyn atap ótti.
Ózderiniń sózderinde uıymǵa múshe 8 memlekettiń delegatsııa basshylary men ShYU-nyń hatshysy Rashıd Alımov halyqaralyq arenada ózara tıimdi yntymaqtastyq tetikterin jetildirý úshin barlyq taraptardyń birlesken jáne úılestirilgen qımylynyń mańyzdy ekenin atap ótti.
