Máskeýde saılaý ýchaskesi ashyldy

MÁSKEÝ. QazAqparat - Máskeý ýaqyty boıynsha saǵat 07:00-de Reseı Federatsııasyndaǵy QR Elshiligi janynan ashylǵan №265 saılaý ýchaskesinde Qazaqstannyń Ánurany shyrqalyp, saltanatty jaǵdaıda daýys berý bastaldy, dep habarlaıdy «QazAqparat» HAA menshikti tilshisi.

Demalys kúnine qaramastan, Reseıdiń ár óńirindegi qazaqstandyqtar ózderiniń azamattyq jáne konstıtýtsııalyq paryzyn óteý úshin tańerteń erte №265 saılaý ýchaskesine daýys berýge keldi.

«Men Máskeýge qyzmettik issaparmen keldim. Otanymnan alysta bolǵanyma qaramastan, tańerteń ertemen azamattyq jáne konstıtýtsııalyq mindetimdi oryndaý úshin saılaý ýchaskesine keldim», - dedi Máskeýdegi №265 saılaý ýchaskesinde alǵashqylardyń biri bolyp daýys bergen qazaqstandyq Serik Esenbaev.

«Qazaqstannyń bolashaǵy bizdiń árbirimizdiń tańdaýymyzǵa tikeleı baılanysty», - dedi ol.

Reseı Federatsııasynyń aýmaǵyndaǵy qazaqstandyq azamattar Qazaqstannyń dıplomatııalyq ókildikteri janynan qurylǵan 5 saılaý ýchaskesinde: Máskeý, Sankt-Peterbýrg, Qazan, Astrahan jáne Omby qalalarynda daýys bere alady.

Avtory Medet Ahmetov