Máskeýde «Roskosmostyń» burynǵy dırektory óli kúıinde tabyldy
ASTANA. QazAqparat - «Roskosmos» memlekettik korporatsııasynyń burynǵy dırektory Vladımır Evdokımov Máskeýdiń tergeý oqshaýlaǵyshynda óli kúıinde tabyldy.
«Vladımır Evdokımovtyń tergeý oqshaýlaǵyshynyń № 5 kamerasynda qaıtys bolǵany rastaldy, alaıda neden kóz jumǵany ázirge belgisiz», - dep habarlady Máskeý qoǵamdyq baqylaý komıssııasynyń múshesi Eva Merkacheva.
RF Tergeý komıteti máskeýlik tergeý basqarmasy 1965 jyly týǵan er adamnyń keýde tusynda pyshaq jaraqaty baryn anyqtady. Atalǵan fakti boıynsha tergeýge deıingi tekserý jumystary júrýde jáne aıyptalýshy qazasynyń sebepteri anyqtalýda. Tergeý oqshaýlaǵyshynyń laýazymdy tulǵalarynyń áreketine qatań baǵa berildi.
2016 jyldyń jeltoqsan aıynda Máskeýdiń Basman aýdandyq soty asa iri kólemdegi alaıaqtyq aıyby boıynsha Evdokımov pen «Ǵylymı-tehnıkalyq ortalyq» jabyq AQ bas dırektory Aleksandr Zolındi tutqyndady. Tergeý nusqasyna sáıkes, aıyptalýshylar baqylaýdaǵy jáne kommertsııalyq uıymdar arqyly quny 200 mıllıon rýblden asatyn «MıG» Reseı ushaq qurastyrý korporatsııasy» QAQ memlekettik múlkine quqyqtardy zańsyz ıelengen.
