Máskeýde Reseı qazaqtarynyń kezdesýi ótti

MÁSKEÝ. QazAqparat - Máskeýde Halyq sharýashyǵy jetistikteriniń kórmesindegi (HShJK) «Qazaqstan» pavılony alańynda «Otandastar qory» KeAQ basshylyǵy Reseı qazaqtary mádenı ortalyqtarynyń basshylarymen jáne belsendilerimen kezdesti, dep habarlaıdy QazAqparattyń menshikti tilshisi.

Jıyndy ashqan «Otandastar» qorynyń prezıdenti Abzal Saparbekuly kezdesýdiń maqsaty – Kamchatkadan Sankt-Peterbýrgke deıingi Reseıdiń túkpir-túkpirindegi qandastarymyzdy bir ústel basyna biriktirý ekenin aıtty.

«Bizdiń kezdesýimizdiń maqsaty memleketimizdiń osy saladaǵy mindetterimen tyǵyz baılanysty, bul - Reseıdegi qazaqtardyń birligin nyǵaıtý, otandastarymyzben yntymaqtastyq, qazaq halqynyń dástúri men mádenıetin, tilin saqtaý, urpaqtar sabaqtastyǵyn qamtamasyz etý, sondaı-aq mańyzdy máseleler boıynsha pikir almasý úshin dıalog alańyn qurý», - dep atap ótti qor basshysy.

Abzal Saparbekuly sondaı-aq bıyl qor sheteldik qandastardyń memýar, áńgime, proza, poezııa janryndaǵy shyǵarmalaryn jáne ǵylymı zertteýlerin qazaq jáne orys tilderinde basyp shyǵarýdy kózdeıtin «Uly Dala» jobasyn iske asyrýǵa kiriskenin habarlady.

Reseıdegi qazaq dıasporasy ókilderi de kókeıdegi oılaryn ortaǵa saldy.

Kóbisi tyǵyz ózara is-qımyldy damytý perspektıvalaryna, Qazaqstanda ótkiziletin is-sharalar týraly ýaqtyly aqparat alýǵa, birlesken bilim berý, tanymdyq, týrıstik jáne ózge de jobalardy iske qosý múmkindigine, sondaı-aq ulttyq biregeılikti saqtaý isindegi birqatar máselelerdi sheshýge qatysty boldy.

Qatysýshylar jastardy qazaqtardyń ulttyq kodyn saqtaý jumysyna tartý, jınalǵan tájirıbe men bilimdi jas urpaqqa berý úshin jaǵdaı jasaý qajettigine erekshe nazar aýdardy.