Máskeýde Pýtın men Ýıtkofftyń bes saǵatqa sozylǵan kezdesýi ótti
MÁSKEÝ. KAZINFORM — Kremlde Reseı prezıdenti Vladımır Pýtın men AQSh prezıdentiniń arnaıy ókili Stıven Ýıtkoff arasynda bes saǵatqa sozylǵan kezdesý ótti. Kelissózder Ýkraınadaǵy jaǵdaıdy retteýge arnaldy, dep habarlaıdy agenttik tilshisi.
Reseı tarapynan kelissózderge prezıdenttiń kómekshisi ıÝrıı Ýshakov jáne Reseı tikeleı ınvestıtsııalar qorynyń (RTIQ) basshysy, ınvestıtsııalyq-ekonomıkalyq yntymaqtastyq jónindegi arnaıy ókil Kırıll Dmıtrıev qatysty.
AQSh tarapynan prezıdenttiń kúıeý balasy, kásipker, ınvestor, Affinity Partners kompanııasynyń negizin qalaýshy Djared Kýshner boldy.
Kremldiń saıtynda 19:45-te V.Pýtınniń S.Ýıtkoffty qabyldaǵany týraly aqparat jarııalandy.
Kelissózder tún ortasynan aýǵanda aıaqtaldy, shamamen túngi 1.00-den ótkende Telegram-arnalar Ýıtkofftyń kezdesýden keıin Máskeýdegi AQSh elshiligine kelgenin habarlaǵan vıdeony taratty.
Kelissózder aıaqtalǵan soń K.Dmıtrıev olardy nátıjeli dep baǵalady.
Reseı prezıdentiniń kómekshisi ıÝ.Ýshakov kezdesýdi paıdaly, konstrýktıvti jáne mazmundy ótti dep atap, sondaı-aq Reseı men AQSh-tyń ekonomıkalyq ózara is-qımyl perspektıvalary da talqylanǵanyn jetkizdi.
— RF prezıdenti V.Pýtın men Stıven Ýıtkoff Ýkraına boıynsha uzaq merzimdi beıbit retteý perspektıvalaryn talqylady. Eń bastysy — taraptar Ýkraınadaǵy uzaq merzimdi beıbit retteýge qol jetkizý úshin birlesken jumysty jalǵastyrýǵa daıyn ekenderin bildirdi, — dedi Ýshakov kezdesýden keıin jýrnalısterge.
Ol sondaı-aq kezdesýde V.Pýtın AQSh-tyń Ýkraına jónindegi josparynyń keıbir tustaryna Reseı kelise alatynyn, al keıbir máseleler Máskeýdiń synyna sebep bolyp otyrǵanyn jetkizdi. Ýshakovtyń aıtýynsha, Ýkraına daǵdarysyn retteýge qatysty amerıkalyq birqatar usynysty talqylaýǵa bolady. Ázirge kelisilgen nusqa joq, biraq AQSh tarapynan usynylǵan keıbir ıdeıalar «birshama qolaıly» kórinedi jáne olardy talqylaýǵa bolady.
Kezdesý bastalmaı turyp, aqparat keńistiginde S.Ýıtkoff, K.Dmıtrıev jáne Dj.Kýshnerdiń Qyzyl alańda serýendep júrgen vıdeosy tarady.
Osylaısha S.Ýıtkoff bıyldyqqa Máskeýge altynshy márte kelip otyr. Osy jolǵy kezdesýde ol Reseı basshysyna AQSh-tyń Ýkraına boıynsha beıbit usynystaryn tanystyrady dep kútilgen.
Sol kúni Úndistan BAQ-taryna arnalǵan brıfıngte Reseı prezıdentiniń baspasóz hatshysy D.Peskov bul kezdesýdiń Ýkraına qaqtyǵysyn beıbit jolmen sheshýge mańyzdy qadam bolatynyn aıtty.
K.Dmıtrıev X áleýmettik jelisinde búgin Ýkraına boıynsha beıbit kelissózder úshin mańyzdy kún ekenin, AQSh prezıdenti Donald Tramptyń Gazadaǵy beıbit kelisimin daıyndaǵan komanda Máskeýge kelip, Tramptyń Ýkraına jónindegi beıbit josparyn ilgeriletýge nıetti ekenin jazdy.
Birqatar BAQ Tramptyń úkimet otyrysy barysynda ózinen «Máskeýdegi Ýkraına kelissózderinen serpilis kútý kerek pe?» dep suraǵanda, ol bul jóninde naqty aıta almaıtynyn, biraq basty maqsaty — aı saıyn myńdaǵan adamnyń ómirin saqtap qalý ekenin aıtqanyn habarlady.
Eske sala ketsek, Pýtınniń Ýıtkoffpen kezdesýi 2 jeltoqsanǵa josparlanǵan edi.
Al buǵan deıin AQSh prezıdentiniń arnaıy ókili Stıven Ýıtkofftyń Máskeýge kelgenin jazdyq. Ony Kremlde prezıdent Pýtın qabyldady.
https://t.me/RIAKremlinpool/18328