Máskeýde oqýshylardyń kúzgi kanıkýly eki aptaǵa sozylady
MÁSKEÝ. TASS-QazAqparat – Máskeýde mektep oqýshylary 5-18 qazan aralyǵynda demalysqa jiberiledi, dep habarlaıdy QazAqparat TASS agenttigine silteme jasap.
«Qyzmeti men quzyretin Máskeý qalasynyń atqarýshy organdary júzege asyratyn jalpy bastaýysh, jalpy negizgi, jalpy orta, qosymsha bilim beretin jáne sporttyq daıyndyq uıymdarynyń oqýshylary úshin kanıkýl 2020 jyldyń 5 qazanynan bastap, 18 qazandy qosa alǵandaǵy aralyqta belgilensin», - delingen qujat mátininde.
Máskeý meri Sergeı Sobıanın óz blogynda málim etkendeı, bul rette qaladaǵy balabaqshalar burynǵy rejımde jumys isteýin jalǵastyra beredi. Qujatta atap ótilgendeı, dúısenbiden bastap balalardyń bos ýaqytyn uıymdastyrýǵa arnalǵan mekemelerge barý eki aptaǵa toqtatyldy.
«Qazannyń 5-inen bastap Máskeýdiń kóptegen mektepterinde josparly kúzgi kanıkýl bastalady. Taǵy biraz mektepte olar sál keıinirek bastalyp, ádette bir aptaǵa sozylady. Sanıtarlyq dárigerlerdiń keńesi boıynsha, kúz mezgilinde tumaý aýrýynyń órshýi sebebimen jáne kovıd vırýsyna shaldyǵý oqıǵalary ósimin esepke ala otyryp, men kúzgi kanıkýldy eki aptaǵa deıin sozý sheshimin qabyldadym», - dep túsindirdi óz sózinde Máskeý meri.
