Máskeýde Nursultan Nazarbaevtyń «Táýelsizdik dáýiri» kitaby tanystyryldy
MÁSKEÝ. QazAqparat - Reseıdegi Qazaqstan elshiliginiń qoldaýymen Qazaqstan Respýblıkasynyń Tuńǵysh Prezıdenti - Elbasy qory Máskeýde QR Prezıdenti Nursultan Nazarbaevtyń «Táýesizdik dáýiri» kitabynyń tusaýkeserin ótkizdi.
Kitaptyń tanystyrylymy «Rossııa Segodnıa» Halyqaralyq aqparat agenttiginde Máseký-Astana vıdeokópiri túrinde ótti.
Tusakeser rásiminde Ingýshetııanyń birinshi prezıdenti, Keńes Odaǵynyń Batyry Rýslan Aýshev Elbasy kitabynyń tájirıbe esebinde óte paıdaly ekendigin atap ótti jáne bul týyndynyń «bolashaǵyn oılaıtyn, óziniń memleketi úshin janashyr bolýǵa umtylatyn ár adamnyń» sóresinde bolǵanyn qalaıtyndyǵyn bildirdi.
«Dostastyq keńistiginde, alys ta jaqyn memleketterde Nursultan Nazarbaev tárizdi tájirıbeli jáne talantty basshy joq. Eger 1990 jyldan bastap qazirgi kúnge deıin Qazaqstan júrip ótken joldy eske alatyn bolsaq - bul aldymen Qazaqstannyń Tuńǵysh Prezıdentiniń qajyrly eńbeginiń jemisi»,- dedi R. Aýshev.
Sondaı-aq ol bizdiń Elbasynyń elordany Almatydan Astanaǵa kóshirý tájirıbesinen úlgi alǵandyǵyn eske saldy.
«Ol kezde men respýblıka prezıdenti edim. Maǵan da astanany Nazranǵa kóshirýdi usyndy. Men Nazarbaevtyń tájirıbesine súıene otyryp astanany Magasqa kóshirdim. Búginde Magas - Ingýshetııa astanasy»,- dedi R. Aýshev.
RF arnaıy ókili Mıhaıl Shvydkoı óz sózinde basqarýshylyqpen aınalysatyndarǵa, qarapaıym jandarǵa bul kitapty oqýdyń orny bólek ekendigin jetkizdi.
«Nursultan Ábishuly Nazarbaev óz kitabynda Qazaqstannyń eń basty baılyǵy - adamdar ekendigin jazady. Eldiń bolashaǵyn jarqyn etýge kóp ultty Qazaqstan qaýqarly»,- dedi M.Shvydkoı.
Sondaı-aq shyǵarmanyń tusaýkeseri aıasynda bıyl 20 jyldyǵyn toılaǵaly otyrǵan elordanyń 60-tan astam záýlim de kórikti nysandary qoıylǵan «Astana - Uly dalanyń kórki» atty sýret kórmesi ashyldy. Atalǵan kórme budan keıin Beıjiń, Madrıd, Parıj, London jáne Berlınde kórsetiletin bolady.
