Máskeýde Nurǵısa Tilendıevtiń 100 jyldyǵyna arnalǵan kontsert ótti
MÁSKEÝ. KAZINFORM — Máskeýdegi «Gelıkon-opera» mýzykalyq teatrynda uly qazaq kompozıtory Nurǵısa Tilendıevtiń 100 jyldyǵyna arnalǵan «Álqıssa» atty shyǵarmashylyq kesh ótti, dep habarlaıdy agenttiktiń menshikti tilshisi.
Kontsertti Almaty oblysynyń ákimdigi men Qazaqstan Respýblıkasynyń Reseıdegi Elshiligi uıymdastyrdy.
— Nurǵısa Tilendıev tek kompozıtor ǵana emes, sonymen birge fılosof boldy. Ol áýen men saz arqyly «Biz kimbiz? Qaıdan keldik? Janymyzdy ne tolǵandyrady?» degen basty suraqtarǵa jaýap izdedi. Ol qobyz ben dombyranyń kóne kúıleri men zamanaýı sımfonııalyq formalardy toǵystyra bildi. Onyń shyǵarmalary ǵasyrlar arasyndaǵy únqatys sııaqty: munda dala áýenderi, batyrlyq saryndar, folklorlyq ıntonatsııalar men qatań akademııalyq mektep úılesim tapqan. Tilendıevtiń mýzykasynda óner ǵana emes, halyqtyń jadyn, bolmysyn jáne rýhyn saqtaýdyń joly jatyr, — dedi Qazaqstannyń Reseıdegi Elshisi Dáýren Abaev sharanyń ashylýynda.
Elshi, sondaı-aq, uly kompozıtordyń shyǵarmashylyq murasyn búginde onyń qyzy, dırıjer, Qazaqstannyń eńbek sińirgen mádenıet qaıratkeri Dinzýhra Tilendıeva jalǵastyryp kele jatqanyn atap ótti.
Óz sózinde Dinzýhra Tilendıeva Máskeýde óner kórsetýdiń onyń ákesi úshin de, ózi úshin de erekshe mánge ıe ekenin aıtty.
— Máskeý — ákeme bóten qala emes. Ol munda ataqty ustaz Nıkolaı Anosovtan dırıjerlik ónerdi úırenip, Úlken teatrda taǵylymdamadan ótken. Biz bul kontsertke muqııat daıyndaldyq, repertýardy da erekshe tańdadyq. Ózimniń tegimdi de maqtan tutamyn, ol maǵan úlken jaýapkershilik júkteıdi, — dedi ol.
Keshte Nurǵısa Tilendıevtiń shyǵarmalaryn «Aqjaýyn» kameralyq orkestri, «Altynaı» memlekettik bı ansambli jáne qazaqstandyq sahna juldyzdary oryndady.
Olardyń qatarynda Farhat Kýbıev, Rýhııa Baıdúkenova, Syrym Shonbaev, Tólegen Rahymbaev, Seken Turysbek, Medet Orynbaev, Musa Saparaly, Ádil Ahmetjanov, Ásel Erjanova, Bıbigúl Qylymhan, Núrken Ashırov, Daıana Tilendıeva, Farıza Dosbol jáne IL Canto kvarteti boldy.
Osyǵan deıin Qyrǵyzstanda Nurǵısa Tilendıevtiń 100 jyldyǵyna arnalǵan kontsert uıymdastyrylǵanyn jazǵanbyz.