Máskeýde «Naýryz bank Qazaqstan» AQ basqarmasynyń burynǵy tóraǵasy ustaldy - qarjy polıtsııasy
ASTANA. Naýryzdyń 4-i. QazAqparat /Qanat Qulshymanov/ - Máskeýde «Naýryz bank Qazaqstan» AQ basqarmasynyń burynǵy tóraǵasy ustaldy.
Bul týraly QazAqparat tilshisine Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.
«Ekonomıkalyq qylmysqa jáne sybaılas jemqorlyqqa qarsy kúres agenttigi, qyzmet babyn paıdalanǵan, uıymdasqan top quryp, ony basqarǵan jáne 3,5 mıllıard teńge aqsha urlaǵan, sonymen birge basqa da qylmystar jasaǵan degen aıyppen 2005 jyldyń qazan aıynda halyqaralyq izdeý jarııalanǵan «Naýryz bank Qazaqstan» aktsıonerlik qoǵamy basqarmasynyń burynǵy tóraǵasy Orazaly Erjanovtyń Máskeýde ustalǵany týraly habardy rastaıdy», delingen vedomstvonyń habarlamasynda.
Esterińizge sala keteıik, burynyraq Erjanovtyń sybaılastary - «Naýryz bank Qazaqstan» AQ basqarma tóraǵasynyń burynǵy orynbasary Nurym Dúsibalıev, osy banktiń korporatıvtik qatynastar departamentiniń burynǵy dırektory Nurǵalym Ómirálıev sot úkimimen dúnıe-múlikteri tárkilenip, árqaısysy 6 jylǵa sottalǵan bolatyn. Sonymen birge osy qylmystyq is boıynsha Erjanovtyń eki jaqyn týysy - aǵaıyndy Batyrhan jáne Aman Narbaevtar dúnıe-múlikteri tárkilenip, 5 jylǵa kesilgen edi.
«Qazirgi kezde Máskeýde ustalǵan Erjanovty sotqa berý maqsatynda Qazaqstanǵa ekstradıtsııalaý sharalary júzege asyrylýda», - dep habarlady qarjy polıtsııasynyń baspasóz qyzmetinen.
