Máskeýde Naýryz meıramy toılandy
MÁSKEÝ. KAZINFORM – HShJK-niń «Qazaqstan» pavılonynda Qazaqstannyń Reseıdegi Elshiliginiń uıymdastyrýymen Naýryz meıramyna oraı merekelik is-shara ótti. Bul týraly Elshiliktiń resmı saıtynda habarlandy.
Іs-shara qonaqtary Máskeýde jáne qosymsha Qazaqstanda akkredıttelgen shet memleketterdiń elshileri, halyqaralyq uıymdardyń qyzmetkerleri, Reseı óńirlerinen kelgen otandastar, astanalyq joǵary oqý oryndarynyń qazaqstandyq stýdentteri boldy.
Qazaqstannyń Reseıdegi Elshisi Dáýren Abaev óziniń quttyqtaý sózinde Naýryzdyń jańarý sımvoly ekenin aıtyp ótti jáne bıylǵy jyly elimiz merekeni saıası jáne memlekettik-quqyqtyq jańarýdyń belgisi bolǵan jańa Konstıtýtsııamen atap ótiletinin eskerte ketti.
– Ǵasyrlar óte kele bizdiń áleýmettik-turmystyq jáne órkenıettik ómir saltymyz túbegeıli ózgerse de, bul merekeniń maǵynasy áli de ózekti bolyp qala beredi, tipti odan da qudiretti jáne jan-jaqty bola túspek, – dep atap ótti Elshi.
Sondaı-aq ol barlyǵyna amandyq, zor densaýlyq, sarqylmas qýat tiledi.
Qonaqtardyń kópshiligi Reseıdiń qazaq qoǵamdyq birlestikteriniń ókilderi. Olar ózderiniń jyly lebizderin bildirdi.
Máskeýdegi Qazaq ulttyq-mádenı avtonomııasynyń vıtse-prezıdenti Gúlshat Alımova óz sózinde Máskeýde turǵanymen, ulttyq dástúrlerdi qurmetteıtinin, saqtaıtynyn jáne jas urpaqqa jetkizetinin atap ótti:
– Bul bizdiń Otanymyz, biz ózimizdiń shyǵý tegimizdi umytpaýymyz kerek, – dedi ol.
«Joldastyq» qazaq mádenıeti óńirlik qoǵamdyq uıymy (Astrahan oblysy) tóraǵasynyń orynbasary Álııa Ǵumarova óńirde Naýryz meıramynyń dástúrli túrde keńinen atalyp ótetinin jáne ol bıyl 18 sáýirde merekelenetinin eske saldy. Sondaı-aq ol qazaqstandyqtardy jańa Konstıtýtsııanyń qabyldanýymen quttyqtap, densaýlyq, beıbitshilik jáne órkendeý tiledi.
Merekede kóktemniń basty taǵamy Naýryz kóje jáne qazaq ashanasynyń dástúrli taǵamdary usynyldy. Іs-shara qonaqtary zamanaýı qazaq óneriniń búkil ádemiligi men baılyǵyn kórsetken kontserttik baǵdarlamany tamashalaı aldy. Ǵ.Qurmanǵalıev atyndaǵy Batys Qazaqstan Akademııalyq fılarmonııasynyń ártisteri Erkin Ótegenov pen Aıbar Haıyrhanov, sondaı-aq vırtýoz baıanshy Oljas Nurlanov pen ánshi Aleksandr Frolov ózderiniń shyǵarmashylyq sheberlikterin kórsetti.
Aıta keteıik, Naýryz merekesi Belgııanyń Brıýgge qalasynda da toılandy.
Sondaı-aq Londondaǵy Naýryz toıy aıasynda mádenıet, mýzyka jáne halyq qolóneri festıvali uıymdastyryldy.
