Máskeýde Muhtar Ábilázovtiń sybaılasy 7,5 jylǵa sottaldy
ASTANA. QazAqparat - Máskeýde Meşansk qalalyq soty Muhtar Ábilázovtiń sybaılasy, «Rýsskıe» ultshyl qozǵalysyn qurǵan Aleksandr Potkındi 7,5 jylǵa bas bostandyǵynan aıyrdy. Ol BTA-Bank salymshylarynyń qarajatyn jymqyrdy, ekstremızm jáne ultaralyq arazdyq týdyrdy, de aıyptalyp otyr.
Sonymen qatar, sot BTA-Banktiń 4,9 mlrd. rýblge baǵalanǵan aryzyn qanaǵattandyrdy.
Aıta keteıik, aıyptaýshy tarap oǵan 9 jyl suraǵan bolatyn.
«Jazany túbegeıli qosqan kezde Potkınge jalpy rejımdegi kolonııaǵa 9 jylǵa bas bostandyǵynan aıyrý jazasyn taǵaıyndaýdy suraımyn», - dep habarlady prokýror Máskeýde Meşansk sotynda.
Bul iste basty fıgýrant retinde Frantsııada qamaýǵa alynǵan BTA banktiń eks-basshysy Muhtar Ábilázov júrýde. Ol Potkın arqyly BTA-Bank salymshylarynyń 5 mlrd rýblǵa jýyq salymdaryn zańdastyrýǵa atsalysqan.
Aıyptalýshy óziniń kinásin moıyndamady. Potkın ózine qatysty qylmystyq isti saıası sebeptermen baılanystyryp otyr.
Potkın 2014 jyly 15 qazanda BTA banktiń qarajatyn jymqyrý isi boıynsha ustalǵan bolatyn. Oǵan BTA bank salymshylarynan urlanǵan qarajatyn zańdastyrý, sonymen qatar Qazaqstanda bılikti yǵystyrý jolynda ekstremıstik is-áreketter uıymdastyrý faktisi boıynsha aıyp taǵyldy.
