Máskeýde MMHQI terezesinen qulaǵan qazaqstandyq stýdent qyz aýrýhanaǵa tústi
ASTANA. QazAqparat - Máskeý memlekettik halyqaralyq qatynastar ınstıtýtynyń terezesinen qulaǵan qazaqstandyq stýdent qyz aýrýhanaǵa tústi, dep habarlady «QazAqparat» HAA tilshisine QR SІM resmı ókili Anýar Jaınaqov.
«Bizdiń dıplomattar qazaqstandyq stýdent qyz jatqyzylǵan aýrýhanaǵa bardy. Quqyq qorǵaý organdary oqıǵanyń mán-jaıyn anyqtap jatyr. Kýágerlerden oqıǵanyń qalaı bolǵany suralyp jatyr», - dedi A.Jaınaqov.
Resmı ókildiń aıtýynsha, MMHQI qazaqstandyq stýdenttiń onda oqyǵanyn rastaǵan.
«Stýdenttiń jeke basyna qatysty aqparatty tarata almaımyz. Boıjetken 1997 jyly týǵan», - dedi A.Jaınaqov.
Buǵan deıin reseılik BAQ qazaqstandyq stýdentti boıjetkenniń dosy - daǵystandyq azamat sózge kelip qalǵannan keıin terezeden ıterip jibergenin habarlaǵan bolatyn.
