Máskeýde mıgranttardy qosymsha arqyly baqylaıdy

MÁSKEÝ.KAZINFORM — 1 qyrkúıekten bastap Máskeýde mıgranttardy baqylaýdyń jańa baǵdarlamasy iske qosylady. Ol úshin arnaıy mobıldi qosymsha qarastyrylǵan, onyń kómegimen derekter tirkelip, tekseriletin bolady. Bul týraly Reseı astanasynyń meri Sergeı Sobıanın málimdedi, dep habarlaıdy agenttik tilshisi.

Habarlanǵandaı, jańa baǵdarlama COVID-19 pandemııasy kezinde qoldanylǵan «Áleýmettik monıtorıng» júıesine uqsas (sol kezde syrqattanǵandar ózderiniń ornalasqan jerin habarlap otyrǵan).

Jańa baǵdarlamany paıdalaný arqyly sheteldiktiń qaı jerde júrgenin bilýge bolady.

— Máskeý úkimeti Máskeý óńiriniń aýmaǵynda birqatar tájirıbeler júrgizýge ruqsat aldy. Barlyq áýejaılarda mıgranttarǵa bıometrııalyq baqylaý engizildi. Shekaradan óter aldynda mıgrant bıometrııasyn tapsyrady. Mıgratsııalyq ortalyqta onyń genomdyq derekteri alynady. Mıgranttyń saýsaq izi, bıometrııalyq fotosy jáne genomy bar. Bul bıometrııalyq derekter FSB men ІІM bazasyna engiziledi, keıinnen mıgranttardy baqylaý úshin paıdalanylady. Osyǵan oraı, Máskeýde bet-álpetti taný júıesi jumys istep tur. Qajet bolǵan jaǵdaıda biz árqashan mıgranttyń qaıda júrgenin dál biletin bolamyz, — dedi Sobıanın.

Ol sondaı-aq mıgranttyń elektrondy kartasy engiziletinin aıtty. Oǵan mıgrant týraly barlyq málimet jazylady. QR-kod arqyly polıtseı onyń qashan kelgenin, qansha ýaqytqa kelgenin, qaıda jumys isteıtinin, kóshi-qon zańnamasyn buzǵan-buzbaǵanyn bile alady. Eger buzýshylyq bolsa — qyzyl tús janady, polıtseı ony ustaýy tıis, eger jasyl tús bolsa — másele joq degendi bildiredi.

Deı turǵanmen Sobıanın elde 5 mln jumysshy tapshy ekenin habarlady.

— Mıgranttardy qýyp shyǵýǵa bolady, biraq bul aýyr ekonomıkalyq saldarǵa ákeledi, — dedi.

Buǵan deıin Reseıde tártip buzǵan mıgranttardy elden shyǵarý kórsetkishi 17%-ǵa óskenin habarlaǵan edik.