Máskeýde Marat Omarov «Ómirim - ónerimniń órnegi» atty án keshin ótkizdi

Elimizge eleýli sahna sańlaǵynyń ánderi halqymyzǵa ǵana emes, shet eldegi óner súıer qaýymǵa da jaqsy tanys. Marat Omarovtyń ánderin estimegen qazaq kemde-kem. Onyń «Anashym», «Áke armany», «Qoshtasqym kelmeıdi», «Qyz syny», «Syńarym», «Ánshi balapan», «Arman qala - Astana», «Mekke-Mádıne», «Naýryz» týyndylary halyqtyń súıikti ánderine aınalǵaly qashan.

Óte áserli ótken keshte ulttyq ánderimizge sýsap júrgen qandastarymyz ben óner súıer qaýym bir serpilip qaldy. Bala kúnnen tanys áýender jan-dúnıelerin tebirentip, beı-jaı qaldyrmady. Eki saǵattan astam ýaqyt halyqtyń shalqyma shapalaǵy men qoshemet qushaǵynda án salǵan óner ıesi tyńdarmandaryn tánti etti. Al elimizdiń altyn murasyna engen «Anashym» jyryn zal ánshimen qosylyp aıtty. Týǵan ánderin saǵynǵan máskeýlik qazaqtardyń keshti uıymdastyrýshylarǵa jáne Marat Omarovqa degen alǵystary sheksiz boldy.

Kesh barysynda Reseıdegi Qazaqstannyń Tótenshe jáne Ókiletti Eshlisi Ǵalym Orazbaqov sahna tórine kóterilip, óziniń zor yqylasyn, aqjarma tilegin joldady. Ónerdi tabys kózi dep emes, qundy qazynaǵa balap, keıingi urpaqtyń óner jolyndaǵy óreli bıikke qol jetkizýine sińirgen eńbegine tolaǵaı tabys tiledi.

Naýryz meıramy tusynda halyq ánderin, óziniń ánderin aıtyp, kópten beri saǵynǵan Máskeý kórermenderiniń quryshyn qandyrǵan Marat ánshi de «erekshe áserge bólendim» dep aǵynan jaryldy. Qýanyshyna ortaqtasyp, kontsertke ánshiniń ánderin izdep kelgen qaýymǵa óz rızashylyǵyn bildirgen ánshi, «Ómirim - ónerimniń órnegi» deıdi ǵoı. Otyz jyl bolypty ónerde júrgenime. Endi Máskeýge kelip jatqanym birinshi ret emes. Soǵan endi búkil máskeýlikter kelip, osy tvorchestvolyq keshime at salysyp jatqanyna men óte razymyn», - dep atap ótti kesh sońynda jýrnalısterge bergen suhbatynda.

Óziniń júrekjardy ánderimen qalyń qazaqqa tanylyp, búginde halqynyń ıgiligi jolynda bar kúsh-jigerin salyp júrgen Marat Omarovtyń Máskeýde bastalǵan kontserttik baǵdarlamasynyń jalǵasy qazan aıynda Astanada ótkizilmek.

Sońǵy jyldary dáris berip, talaı talantty shákirt tárbıelep, uly kóshke qosqan ustazdyń sońynan ergen izbasarlary artynan ósip keledi. Shynaıy shynshyl, asqan sheber ánshi ári kompozıtor óziniń saf taza ónerimen keıingi urpaqqa, búkil óner qaýymyna shapaǵatyn tıgizip ilgeri bastaýda. Kópshilik Marat Omarov­tyń balalar arasynda baıqaýlar uıymdastyryp, odan qalsa talantty jetkinshekterdi taýyp, olar­dyń ónerdegi jolyn ashyp júr­geni­nen habardar. «Ánshi balapan», «Balbóbek» arqy­ly tanymal bol­ǵan órender osy kún­deri talantty jastardyń qatarynda júr. Ol óziniń ar­many shákirt tárbıeleý ekenin, olar tek qazaqstandyq sahnada emes, álem­dik sahnalarda án shyr­qasa dep tileıtinin jasyr­mady. Sol maqsatta osydan úsh jyl buryn elorda­myzdan halyq­aralyq «Talant» óner ortalyǵyn ashypty. Bul orta­lyq­­qa naǵyz ta­bıǵı daryny bar ónerli bala­lar­dy toptastyr­ǵysy keletin sazger aǵamyz, olardy elimizdiń shalǵaı aýyldarynan izdeýge de beıil.