Máskeýde lańkestik áreketten zardap shekken adamdardyń tizimi jarııalandy
MÁSKEÝ. KAZINFORM – Densaýlyq saqtaý mınıstrligi Máskeý túbindegi Krasnogorsk qalasynda bolǵan lańkestik áreketten zardap shekken 145 adamnyń birazynyń tizimin jarııalady.
Buǵan deıin habarlanǵandaı, belgisiz bireýler Krasnogorsk qalasyndaǵy Krokýs sıtı holl ǵımaratynda oq jaýdyrǵan. Kýágerlerdiń aıtýynsha, qylmyskerler keshki saǵat 20:30 shamasynda, kontsert bastalar aldynda negizgi podezd arqyly ǵımaratqa kirip, kelýshiler men kúzetshilerge birden oq atqan. Sodan úsh-tórt adam kontsert zalyna kirip, kórermenderdi atyp, «Molotov kokteılderin» laqtyra bastaǵan. Osydan keıin shabýyl jasaǵandar qashyp ketti.
Bes adamnyń avtomattan adamdarǵa oq atqany habarlandy. Olar kamýflıajdyq kıim kıgen jáne árqaısysynda rıýkzak bolǵan (órt tutandyrý qurylǵysy bolýy múmkin).
Reseı prezıdentiniń baspasóz hatshysy Dmıtrıı Peskovtyń aıtýynsha, memleket basshysyna terakt týraly birinshi mınýtta-aq habarlanǵan.
Reseıdiń Tergeý komıteti Máskeý oblysynda RF Qylmystyq kodeksiniń 205-baby (terakt) boıynsha qylmystyq is qozǵady.
Reseı Federaldy qaýipsizdik qyzmeti lańkestik áreket saldarynan 40 adam qaza taýyp, 100-den astam adam jaralanǵanyn habarlady. Balalar ombýdsmeni Marııa Lvova-Belovanyń aıtýynsha, eki bala jaraqat alǵan, qazir olardyń jaǵdaıy ortasha aýyr.
Qazir saýda ortalyǵynyń aýmaǵynda 50-den astam oblystyq jáne astanalyq jedel járdem brıgadasy, ondaǵan órt sóndirý mashınacy bar. Tótenshe jaǵdaılar mınıstrligi órt tún ortasyna qaraı sóndirilgenin habarlady.
Aldaǵy kúnderi Máskeýde memlekettik mekemelerdegi barlyq oıyn-saýyq sharalary toqtatyldy.
Birqatar telegram-arnalardyń málimetinshe, halyqaralyq Reuters jáne CNN agenttikteri Máskeýdegi lańkestik áreketti DAISh lańkestik toby óz moınyna alǵanyn habarlady.
Aıta keteıik, Máskeýdegi Krokýs sıtı holl kontsert zalynda bolǵan qaıǵyly oqıǵaǵa baılanysty Qazaqstan azamattary úshin myna senim telefony boıynsha jedel jeli iske qosyldy: 8 (925) 897-71-14.
QR Syrtqy ister mınıstrligi habarlaǵandaı, Reseıdegi teraktide qaza tapqandar men zardap shekkender arasynda qazaqstandyqtar bar ekeni týraly aqparat joq.
