Máskeýde Qurannyń sırek kezdesetin danalarynyń kórmesi uıymdastyryldy
ASTANA. 9 sáýir. QazAqparat - Taıaýda ashyq esik kúnderin ótkizgen Máskeý ıslam ýnıversıtetinde jurt Qurannyń sırek kezdesetin danalaryn tamashalady.
Jádigerlerdiń arasynda HH ǵasyrdyń bas kezinde kóshirmesi jasalǵan baǵa jetpes «Osman Qurany» da boldy, dep habarlaıdy muslim.kz.
Máskeý Soborlyq meshiti janyna qurylǵan medrese dırektorynyń orynbasary ımam Marat Arshabaev jurtshylyqty Qasıetti Qurannyń tarıhymen tanystyrdy.
«Osman Qurany» ıa bolmasa «Samarqandyq kýfalyq Quran» - osy kúnge deıin saqtalǵan eń ejelgi qoljazba bolyp tabylady. Baǵa jetpes bul qoljazbada Paıǵambarymyz Muhammed Mustafanyń (s.a.s.) senimdi serikteriniń biri, úshinshi halıfa Osmannyń (r.a.) qany tógilgen jeri qaraıyp tur. Qasıetti Qurannyń bul kóshirmesi Tashkenttegi Tılla Shaıh meshitinde kózdiń qarashyǵyndaı saqtalyp turǵanyn aıta ketý kerek.
Atalmysh sharanyń aıasynda osynaý keleli de kıeli iske uıytqy bolǵan Máskeý Islam ýnıversıtetine Iordanııada basylyp shyqqan, pil súıegimen jáne asyl tastarmen kómkerilgen Qurannyń danasy tartý etildi. Dál osy Qurandy 1994 jyly Máskeý joǵarǵy dinı ıslam kolledjiniń ashylý saltanatyna oraı Iran elshisi syılyqqa berip, jurtshylyqqa tanystyrǵan bolatyn. Keıin osy kolledjdiń bazasynda Máskeý Islam ýnıversıteti qurylǵan edi.
Buǵan qosa, meımandar álemniń túkpir-túkpirinen aldyrylǵan Qurannyń ózge de sırek kezdesetin danalarymen tanysty.
