Máskeýde kóz jumǵan úsh adam Qostanaı oblysynyń turǵyndary bolyp shyqty
ASTANA. QazAqparat - Máskeý oblysynda júk kóliginiń kabınasynan denesi tabylǵan Qazaqstan azamattary týraly jańa derekter shyqty, dep habarlaıdy QazAqparat tilshisi QR SІM baspasóz qyzmetine silteme jasap.
«2018 jylǵy 24 aqpanda Máskeý oblysynyń Novoselkı eldi mekeninen máıiti tabylǵan úsh er adam Qazaqstan azamattary, 1965, 1968 jáne 1971 jylǵy Qostanaı oblysynyń turǵyndary bolǵan», - dep málimdedi vedomstvonyń baspasóz qyzmeti.
Mınıstrliktegilerdiń aıtýynsha, qaıtys bolǵandardyń týystaryna oqıǵa týraly habar berilgen.
«Qazaqstannyń Reseıdegi elshiligi konsýldik-quqyqtyq kómek kórsetedi, sonyń ishinde qaıtys bolǵandardyń denesin Qazaqstanǵa jetkizýdi uıymdastyrýǵa járdem beredi», - deıdi SІM baspasóz qyzmetiniń ókilderi.
Eske sala keteıik, úsh qazaqstandyqtyń denesi Máskeý oblysynda, júk kóliginiń kabınasynan tabylǵan bolatyn. Kabınadan gazben janatyn sham tabyldy. Ony jylyný úshin paıdalanǵan bolýy múmkin.
Er adamdar gazdan ýlaný saldarynan qaza tapqan bolýy yqtımal, alaıda ólimniń naqty sebepteri tek saraptamadan keıin belgili bolady.
Avtor - Azamat Syzdyqbaev
