Máskeýde koronavırýsqa baılanysty buqaralyq sharalarǵa shekteý qoıyldy
MÁSKEÝ. TASS-QazAqparat – Máskeý meri Sergeı Sobıanın el astanasynda 5 myńnan astam adam qatysatyn buqaralyq sharalardy ótkizýge tyıym salynǵany týraly habarlady. Bul shekteý 10 sáýirge deıin jalǵasady, dep habarlaıdy QazAqparat TASS agenttigine silteme jasap.
«Búgin men Máskeýde 5 myńnan astam adamnyń qatysýymen ótetin buqaralyq sharalardy ótkizýge tyıym salý týraly jarlyqqa qol qoıdym», - dep habarlady seısenbi kúni Sobıanın óz jazbasynda.
Onyń aıtýynsha, fýtbol jáne hokkeı oıyndaryn qosa alǵanda, sporttyq is-sharalarǵa kelýshilerge de shekteý qoıylady, qatysýshylar men jankúıerler sany 5 myńnan aspaýy kerek.
Sobıanın koronavırýstyq ınfektsııanyń taralý jaǵdaıy qıyndaǵanyn atap ótti. «Biz Italııadaǵy, Germanııada jáne basqa da eýropalyq kórshilerimizde jaǵdaı qalaı asqynyp jatqanyn kórip otyrmyz», - delingen habarlamada. Osyǵan baılanysty, Máskeý meri adamdardyń densaýlyǵyn qorǵaý úshin qosymsha shekteý sharalaryn qabyldaý qajet ekenin aıtty.
Eske sala keteıik, koronavırýs ınfektsııasy jeltoqsan aıynda QHR-da tarala bastady. Qazirgi ýaqytta 100-den astam elde vırýs juqtyrý jaǵdaılary anyqtalǵan.
