Máskeýde koronavırýs indetin juqtyrǵandarǵa arnalǵan aýrýhanadan órt shyqty
MÁSKEÝ. TASS-QazAqparat – Reseı astanasy Máskeýde koronavırýs indetin juqtyrǵan adamdardy emdeýge arnalǵan aýrýhanadan órt shyqty, dep habarlaıdy QazAqparat reseılik TASS agenttigine silteme jasap.
«Órt Máskeýdegi S. I. Spasokýkotskıı atyndaǵy qalalyq klınıkalyq aýrýhanadan shyqty, delingen RF Tótenshe jaǵdaılar mınıstrliginiń Máskeý qalalyq ókildiginiń baspasóz qyzmetiniń aqparatynda.
«Saǵat 20:30-da Výchechıch kóshesinde 21-shi úıde emdeý mekemesinen órt shyqqany týraly habar tústi. Órt sóndirýshiler oqıǵa ornyna kelip jetti»,-delingen habarlamada.
TASS agenttiginiń derekkóziniń habarlaýynsha , órt ǵımarattyń birinshi qabatynan shyqqan. Onda adamdardyń jeke zattary janyp, ǵımaratty tútin basyp ketken. Ǵımarattan 300 adam evakýatsııalanyp, 5 adam qutqarylǵan.
Máskeý meriniń áleýmettik damý jónindegi orynbasary Anastasııa Rakovanyń aıtýynsha, aýrýhanadaǵy 295 patsıent 30 mınýt ishinde túgeldeı evakýatsııalandy.
«Órtke qarsy dabyl belgisi birden iske qosyldy. Oqıǵa ornyna jedel túrde órt sóndirýshiler men medıtsına qyzmetkerleri jetti. Órt sóndirildi. Bir patsıent mert boldy. Zardap shekkender joq. Patsıentterdiń barlyǵy ǵımarattyń basqa bóligine aýystyryldy, keıbiri ózge aýrýhanalarǵa jiberildi»,-dedi.
