Máskeýde «Qazaqstan–Reseı dostyǵy skveri» ashylady
ASTANA. KAZINFORM — Máskeýde «Qazaqstan–Reseı dostyǵy skveri» ashylady. Bul jaıynda «Rossııskaıa gazeta» basylymynda jaryq kórgen Memleket basshysy Qasym-Jomart Toqaevtyń «Máńgilik dostyq — halyqtarymyzǵa jol silter temirqazyq» degen taqyryppen berilgen avtorlyq maqalasynda aıtylǵan.
— Halyqtarymyzdy jandy jipteı baılanystyratyn kópqyrly gýmanıtarlyq baılanystar da erekshe nazar aýdarýǵa laıyqty. Bıyl Astanada «Qazaqstan men Reseıdiń máńgi dostyq alleıasynyń» saltanatty túrde ashylýy eki el arasyndaǵy myǵym ári dostyq baılanystyń nyshanyna aınaldy. Al jaqyn ýaqytta Máskeýde «Qazaqstan–Reseı dostyǵy skveri» ashylmaq, — dedi Prezıdent.
Memleket basshysynyń aıtýynsha, mýzeıler, kitaphanalar, teatrlar, kórkem galereıalar men kınematografıster arasyndaǵy yntymaqtastyq nyǵaıyp keledi. Jastar, ǵylym jáne sport baǵyttarynda birqatar birlesken forým men is-sharalar ótkizý josparlanǵan. Ǵylym-bilim salasyndaǵy ózara is-qımylǵa da aıryqsha mán beriledi. Joǵary tehnologııalyq jobalardy júzege asyrý bilikti mamandarsyz múmkin emes. Óıtkeni bilim jasandy ıntellekt pen jappaı tsıfrlandyrý dáýirinde bolashaqtyń ıntellektýaldy irgetasyn qalyptastyrady.
— Qazaqstanda Reseıdiń toǵyz jetekshi joǵary oqý ornynyń fılıaly tabysty jumys istep tur. Sońǵy jyldary bilim salasyndaǵy seriktestik jańa deńgeıge kóterildi: Astanada Máskeý memlekettik halyqaralyq qatynastar ınstıtýtynyń fılıaly ashyldy, al Omby qalasynda ál-Farabı atyndaǵy Qazaq ulttyq ýnıversıtetiniń fılıaly jumysyn bastady. Bul — Reseı aýmaǵyndaǵy sheteldik joǵary oqý ornynyń alǵashqy ókildigi. Bul tek kadr daıarlaý men akademııalyq baılanysty nyǵaıtý ǵana emes — bul naqty senimge jáne shynaıy strategııalyq jaqyndasýǵa negizdelgen berik kópir. Buǵan qosa, Almaty qalasynda Reseıdiń áıgili «Sırıýs» mektebiniń fılıalyn salý týraly mańyzdy sheshim qabyldandy, — dedi Qasym-Jomart Toqaev.
Esterińizge sala keteıik, Prezıdent Qasym-Jomart Toqaev 11-12 qarashada Reseı Federatsııasyna memlekettik saparmen barady.