Máskeýde Qazaqstannyń ınvestıtsııalyq múmkindikteri talqylandy
Kompanııanyń top-menedjerleri qordyń damý strategııasy, jekeshelendirý baǵdarlamasy, sondaı-aq Qazaqstannyń ınvestıtsııalyq ahýaly týraly áńgimelep berdi. «Samuryq-Qazyna» AQ transformatsııalaý, jekeshelendirý jáne qaıta qurylymdaý jónindegi basqarýshy dırektory Nurlan Rahmetov jekeshelendirý baǵdarlamasyna 876 aktıv kirgizilgenin atap ótti, onyń ishinde 215 aktıv Qorǵa tıesili.
«Búgingi kúni is júzinde 141 aktıv básekelestik ortaǵa aýysty. Osy jyldyń sońyna deıin taǵy 50 kompanııa satylady. Aktıvterdiń aıtarlyqtaı bóligi satylyp qoıdy. Aqtóbe, Atyraý, Pavlodardaǵy 3 áýejaıǵa; Aqtaý halyqaralyq teńiz saýda portyna; «QazTeńiztransFlot» kompanııasyna strategııalyq ınvestor tartýdy josparlap otyrmyz. Almatydaǵy QBTÝ, jaqynda Qazaq kólik jáne baılanys akademııasyn sattyq, Qazaqstan ınjınırıng «Samuryq-Qazyna» qurylymyna kiredi, onda úsh zaýyt bar», - dedi N.Rahmetov.
Ol, sondaı-aq, Jekeshelendirý baǵdarlamasynyń naryqtyq jaǵdaılarda kapıtaldy tıimdi túrde salýǵa tamasha múmkindik berip otyrǵanyn atap ótti.
«Bizde ınvestorlarǵa arnap jaqsy jaǵdaı jasalǵan. Áriptester, Qazaqstanǵa qarajat quıyńyzdar, - dedi Rahmetov kezdesý qatysýshylaryna. - Qazaqstan - úlken múmkindikter eli. Sizderde «Samuryq-Qazyna» atty seriktes bar. Biz yntymaqtastyq ornatýǵa daıynbyz. Úkimet ınvestorlarǵa arnap jaqsy jaǵdaı týǵyzyp otyr. Olar ımporttyq keden salyǵynan 5 jylǵa, korporatıvtik tabys salyǵy men jer salyǵynan 10 jylǵa jáne múlik salyǵynan 8 jylǵa bosatylady».
Esterińizge sala keteıik, reseılik jáne halyqaralyq ınvestorlardy Qor aktıvterin jekeshelendirý baǵdarlamasyna qatysýǵa shaqyrý jáne jekeshelendirýdiń aldaǵy josparlary týraly naryqty aqparattandyrýdy arttyrý maqsatynda jaqynda «Samuryq-Qazyna» AQ 2018 jylǵy Peterbýrg Halyqaralyq ekonomıkalyq forýmy aıasynda alǵash ret Investor kúnin ótkizgen bolatyn. Qazaqstannyń ınvestıtsııalyq múmkindikterine arnalǵan paneldik sessııaǵa 134 reseılik jáne 74 sheteldik kompanııa ókili qatysty.
