Máskeýde Qazaqstannyń týrıstik áleýeti tanystyryldy
MÁSKEÝ.KAZINFORM – «Astana Tourism» týrızmdi damytý ortalyǵy Máskeýde roýd-shoý ótkizip, Qazaqstannyń týrıstik áleýetin Reseıdiń týroperatorlaryna, týrıstik bıznes ókilderine jáne salalyq uıymdarǵa tanystyrdy, dep habarlaıdy agenttik tilshisi.
Іs-shara bıylǵy mamyr aıynda Omby, Novosibir jáne Ekaterınbýrg qalalarynda uıymdastyrylǵan kóshpeli tanystyrylymdar serııasynyń jalǵasy boldy. Roýd-shoýdyń negizgi maqsaty – eki eldiń týrıstik qaýymdastyqtary arasyndaǵy yntymaqtastyqty nyǵaıtý, iskerlik baılanystardy keńeıtý jáne týrıstik aǵyndy arttyrý.
– Reseı Astana úshin kirmelik týrızmniń negizgi naryǵy bolyp qala beredi. Elordaǵa keletin sheteldik qonaqtardyń shamamen 39 paıyzyn Reseıden keletin týrıster quraıdy. Búginde Astana – Ortalyq Azııadaǵy eń qarqyndy damyp kele jatqan qalalardyń biri. Elorda Eýropa men Azııany baılanystyratyn mańyzdy óńirlik habqa aınalyp keledi. Qala yńǵaıly kólik qatynasymen jáne halyqaralyq baǵyttar jelisiniń turaqty keńeıýimen erekshelenedi, – dedi «Astana Tourism» týrızmdi damytý ortalyǵy» JShS basqarma tóraǵasynyń orynbasary Saıat Qusaıynov.
Іskerlik baǵdarlama aıasynda qatysýshylarǵa Astananyń týrıstik áleýeti tanystyrylyp, qaladaǵy týrızm ındýstrııasynyń negizgi damý baǵyttary usynyldy. Atap aıtqanda, iskerlik sapar men demalysty ushtastyratyn b-leisure baǵytyna, sondaı-aq medıtsınalyq, óndiristik, mádenı-oıyn-saýyq, wellness jáne gastronomııalyq týrızmge, shopıng-týrlar men oqıǵalyq týrızmge erekshe nazar aýdaryldy.
Reseılik seriktesterge Astanada jaqyn arada ótetin iri halyqaralyq is-sharalardyń kúntizbesi tanystyryldy. Olardyń qatarynda Leonardo da Vınchıdiń murasyna arnalǵan kórme, Comic Con Astana 2026 halyqaralyq gık jáne pop-mádenıet festıvali, «Bolashaq oıyndary – 2026» mýltısporttyq týrnıri, Enrıke Iglesıastyń kontserti jáne ulttyq taǵamdar men qymyzǵa arnalǵan BaiQymyz festıvali bar.
Іs-shara qatysýshylaryna elordanyń negizgi kórikti oryndary, týrıstik ınfraqurylymynyń damýy jáne Reseı naryǵyna beıimdelgen daıyn týrıstik ónimder týraly da aqparat berildi.
Astana delegatsııasynyń quramyna memlekettik organdardyń ókilderi, «Astana Tourism» týrızmdi damytý ortalyǵynyń mamandary, týroperatorlyq kompanııalar, qonaqúı bıznesi, áýe tasymaldaýshylary jáne týrıstik salanyń basqa da qatysýshylary kirdi.
Іs-shara barysynda elordanyń týrıstik qaýymdastyǵy ókilderiniń tanystyrylymdary ótip, reseılik áriptestermen B2B formatyndaǵy kezdesýler uıymdastyryldy. Taraptar aldaǵy yntymaqtastyqtyń perspektıvalaryn, birlesken jobalardy iske asyrý jáne týrızm salasyndaǵy seriktestikti keńeıtý máselelerin talqylady.
Uıymdastyrýshylardyń aıtýynsha, roýd-shoý ótkizý Qazaqstan men Reseı arasyndaǵy týrızm salasyndaǵy yntymaqtastyqty nyǵaıtýǵa yqpal etip, eki eldiń týrıstik ónimderin ózara ilgeriletýge qosymsha múmkindik beredi.
Іs-shara Astanany halyqaralyq naryqta zamanaýı, qarqyndy damyp kele jatqan jáne týrıster úshin tartymdy baǵyt retinde tanytý jolyndaǵy kezekti mańyzdy qadam boldy.
Osyǵan deıin habarlaǵanymyzdaı, Qazaqstanda týrızmge tartylǵan ınvestıtsııalar 1,2 trln teńgeden asty.
