Máskeýde qazaqstandyq jaýyngerlerdiń súıegin tapsyrý rásimi ótti

ASTANA. QazAqparat - Máskeýdegi Qazaqstannyń Elshiliginde Uly Otan soǵysynda qaza tapqan qazaqstandyq jaýyngerlerdiń súıegin tapsyrý rásimi ótti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Olardy Tver oblysynan «Pamıat pokolenıı» jáne «Frontovye dorogı» izdestirý toptary tapty. Jaýyngerlerdiń medalondarynda saqtalǵan jazbalardyń arqasynda 1903 jyly Almaty oblysynda týǵan Fılıpp Parasenko men 1913 jyly Soltústik Qazaqstan oblysynda týǵan Ivan Sýrnındi anyqtaý múmkin boldy. Ekeýi de 1942 jyly Rjev túbindegi qandy shaıqasta qaza tapqan.

QR RF Elshisi Dáýren Abaev óz sózinde Qazaqstan qaza bolǵan ata-babalarymyzdy eske alyp, qurmetteıtinin atap ótti.

«Sizder úlken is atqardyńyzdar, sonymen qatar, soǵys jyldaryndaǵy halyqtyń erligi týraly tarıhı jadymyzdy qalpyna keltirý jáne saqtaý úshin áli de kóp jumys jasaıtyndaryńyzǵa senimdimin», – dep izdestirýshilerge alǵysyn bildirdi.

«Atamnyń amanaty» qoǵamdyq birlestiginiń basqarma tóraǵasy Murat Moldaǵalıev birlestik jumys istegen bes jyl ishinde soǵys jyldarynda habarsyz ketip, qaza tapqan 2,5 myńnan astam qazaqstandyqtyń taǵdyryn anyqtaý múmkin bolǵanyn eske saldy. Ol Ivan Sýrnınniń týystary tabylǵanyn, al Fılıpp Parasenkonyń týystary izdestirilip jatqanyn aıtty. Jaqyn arada jaýyngerlerdiń súıegi Qazaqstanǵa jetkizilip, tolyq qurmetpen jerlenetin bolady.

Tver oblystyq «Pamıat pokolenıı» izdestirý-zertteý birlestiginiń jetekshisi Natalıa Nazarova Qazaqstan týmasy retinde jerlesteriniń súıegin taýyp, olardy týǵan jerine aqtyq saparǵa shyǵaryp salý erekshe mańyzdy ekenin moıyndady.

«Frontovye dorogı» izdestirý otrıady komandıriniń orynbasary Oleg Dagýrov izdeýshiler úshin nomınaldy medalon tabýdan asqan baqyt joq ekenin atap ótti.

«Adam mınometpen atylyp qaza tapqanda, onyń medalonynyń tolyq saqtalyp qalýy naǵyz ǵajaıyp qubylys. Bizdiń halyqtar ıyq tirese soǵysyp, úlken shyǵynǵa ushyrady. Olardyń erligin umytpaı, este saqtaǵandaryńyzǵa óte rızamyn. Qandaı jaǵdaı bolmasyn, bizdiń elimizdiń bolashaǵy jarqyn bolatynyna senemin» – dedi ol.

Shara barysynda qaza tapqandardy hrıstıandyq dástúr boıynsha aqtyq saparǵa shyǵaryp saldy.

Qaza tapqan jaýyngerlerdiń súıegin tabý boıynsha qazaqstandyq jáne reseılik izdeý toptarynyń birlesken jumysy jalǵasady.