Máskeýde qazaqstandyq jalǵan kóripkelder ustaldy
ASTANA. QazAqparat - Máskeý polıtsııasy kóripkeldik qyzmet kórsetemin degen jeleýmen azamattardyń aqshalaryn urlaýmen aılanysqan qylmystyq toptyń is-áreketine tosqaýyl qoıdy, dep habarlady RF ІІM Máskeý qalasy boıynsha Bas basqarmasynyń baspasóz qyzmetinen.
Vedomstvonyń aqparatyna qaraǵanda, 26 shilde kúni Máskeý qylmystyq izdestirý basqarmasynyń qyzmetkerleri basym bóligi Qazaqstan, Tájikstan, Ózbekstan jáne Armenııa azamattarynan turatyn jalǵan balgerler tobynyń 27 múshesin ustady. Jedel ýákilder jarty jyl boıy olardyń zańsyz áreketterin dáleldeıtin jetkilikti aıǵaq jınaǵan. Uıymdasqan toptyń músheleriniń, sonymen birge olardyń zardap shekkendermen arada telefonmen sóılesýleri kúni-túni jazbaǵa túsirilgen.
Qylmystyq topty uıymdastyrýshylar tómengi jalaqyǵa kórshiles respýblıkalardyń azamattaryn tartqan. Olar jumysqa alǵan qyzmetkerleriniń adamnyń senimine kirý, sendire alý múmkindikterin tekserip otyrǵan. Osydan keıin qyzmetke alǵan azamattar call-ortalyqta otyryp, telefon qońyraýlaryna jaýap bergen. Olar balgerlerdiń, kóripkeldiń kómegine júginbek bolyp qońyraý shalǵan azamattardy oıdan shyǵarylǵan problemalarmen sendirip, belgili somaǵa tylsym ádet-ǵuryptan ótýge kóndirgen. Alaıaqtar adamdardy kóptep tartý úshin telearnalar men ǵalamtor arqyly óz qyzmetteri jaıynda jarnamalar taratqan. Qylmystyq topty 48 jáne 45 jastaǵy máskeýlik erli-zaıyptylar basqarǵan.
Alaıaqtardyń zańǵa qaıshy is-áreketterinen kelgen shyǵynnyń jalpy somasy aldyn ala málimetterge sáıkes 800 mln. Rýblden asyp jyǵylady.
