Máskeýde qazaqstandyq dıplomat kóligimen qaǵyp ketken Reseı azamaty mas bolǵan - SІM
ASTANA. 7 qazan. QazAqparat /Aıdar Ospanalıev/ - Máskeýde qazaqstandyq dıplomat kóligimen qaǵyp ketken Reseı azamaty mas bolǵan.
Bul týraly búgin jýrnalıstermen bolǵan brıfıngte Syrtqy ister mınıstrliginiń resmı ókili Asqar Ábıbýllaev málim etti.
Onyń sózine qaraǵanda, 29 qazan kúni Astana ýaqyty boıynsha saǵat 18-45-ter shamasynda Ujymdyq qaýipsizdik shart uıymynyń Qazaqstandaǵy ókiletti ýákildigi apparatynyń birinshi hatshysy Arnur Tynbaı kóshe boıynda taksı ustap turǵan 35 jastaǵy Reseı azamatyn kóligimen qaǵyp ketken. «Aıta ketetin másele, qazaqstandyq dıplomat jol oqıǵasynyń aldynda kóliginiń qozǵalysyn tejep, jol ústinde taksı ustap turǵan azamattyń jol jıegine shyǵýyn kútken. Ókinishke oraı, mas kúıindegi jaıaý júrginshi jol ortasyna qulap qalǵan»,-deıdi resmı ókil.
Onyń sózine qaraǵanda, qazaqstandyq dıplomat osy oqıǵa oryn alysymen birden jedel járdem men Jol qozǵalysy qaýipsizdigi memlekettik ınspektsııasynyń qyzmetkerlerin shaqyrǵan. «Qazirgi tańda Qazaqstan Elshiligi osy oqıǵaǵa baılanysty Reseı bıligimen jáne eldiń quqyq qorǵaý organdarymen tyǵyz qarym-qatynas jasap otyr. Jol -kólik oqıǵasyna kólik júrgizýshisi kináli me, álde jaıaý júrginshi kináli me? degen másele anyqtalýda»,-dedi A.Ábıbýllaev.
