Máskeýde qazaqstandyqtarǵa «Amına» qosymshasyn ornatý mindetti bolady
ASTANA. KAZINFORM - 2025 jylǵy 1 qyrkúıekten bastap astanalyq óńirinde Reseımen vızasyz birqatar memleket azamattarynyń ornalasqan jerin esepke alýdyń eksperımenttik rejımi engiziledi, ol federaldyq zańnamaǵa sáıkes júrgiziletin jáne kóshi-qon esebiniń qoldanystaǵy tártibin aýystyrýǵa arnalǵan. Bul týraly Qazaqstan Respýblıkasynyń Reseı Federatsııasyndaǵy elshiligi habarlady.
— Máskeý qalasy jáne Máskeý oblysyna jumys isteý úshin kelgen Qazaqstan azamattaryna mindetti túrde «Amına» arnaıy mobıldi qosymshasyn mindetti túrde ornatý qajet bolady. Ol sheteldik azamattardy esepke alýdy jeńildetip, kóshi-qon zańnamasyn adal saqtaıtyn sheteldikter úshin bul úderisti odan ári yńǵaıly jáne qoljetimdi etýge arnalǵan, — delingen Qazaqstan Respýblıkasynyń Reseı Federatsııasyndaǵy elshiligi taratqan habarlamada.
Bul talaptan kámeletke tolmaǵan adamdar (18 jasqa deıin) jastar, dıplomattar jáne halyqaralyq uıymdardyń qyzmetkerleri, sonymen birge olardyń otbasy músheleri bosatylady.
— «Amına» Kópfýnktsıonaldy kóshi-qon ortalyǵynyń (MMTs) mekenjaıy boıynsha tirkelýge jáne ishki ister organdaryn turatyn jeri (sheteldik azamat uıyqtaý jáne demalý úshin únemi paıdalanatyn) jáne onyń aýysýy týraly mobıldi qosymsha arqyly qashyqtan habardar etýge múmkindik beredi.
«Amınany» ornatý Kópfýnktsıonaldy kóshi-qon ortalyǵyna nemese Reseı ІІM aýmaqtyq organdaryna barmaı-aq derbes júzege asyrylady, — delingen habarlamada.
Ári qaraı, mobıldi qosymshada avtorızatsııalaý úshin sheteldik azamattyń qoldanystaǵy kartasy qajet. Ony resimdeý úshin kópfýnktsıonaldy kóshi-qon ortalyǵyna júginedi. Karta joǵalǵan jaǵdaıda «Amınaǵa» avtorızatsııalaý úshin pasporttyq málimetterdi engizý jetkilikti.
— Mobıldi qosymsha geolokatsııa arqyly aqparatty Reseıdiń ІІM-ne jiberedi. ІІM organdary málimetterdiń birneshe kún boıy berilmegenin tirkese, onda azamatqa ornalasqan jeriniń meken-jaıyn rastaý nemese onyń ózgergeni týraly Reseıdiń ІІM -ne habarlaý qajettiligi týraly habarlama keledi. Bul úshin ishki ister organdaryna nemese Kóshi-qon ortalyǵyna barý talap etilmeıdi.
Sońǵy monıtorıng kúninen bastap abonenttik qurylǵynyń geolokatsııasy týraly málimet úsh jumys kúninen artyq túspegen jaǵdaıda azamat Kóshi-qon ortalyǵynyń mekenjaıy boıynsha esepten shyǵarylady, — delingen elshilik habarlamasynda.
Eksperıment engizilgennen keıin monıtorıng sharttaryn buzý azamat týraly málimetterdi Baqylanatyn tulǵalardyń tizilimine engizýge negiz bola alady.
— Kóshi-qon esebine eksperıment júrgizilip jatqan aýmaqtardan tys jerde qoıylǵan nemese elden shyqqan jaǵdaıda azamat KKO mekenjaıy boıynsha esepten shyǵarylady, tıisti habarlama «Amına» mobıldik qosymshasy arqyly kelip túsedi.
Bolashaqta «Amına» qosymshasyn monıtorıng fýnktsııalarynan basqa, paıdalanýshylar úshin ózge de qajetti múmkindikter paıda bolady. Mysaly, onda patent tóleýge, kóshi-qon ortalyǵyna barý úshin aldyn-ala jazylý jáne t. b. qyzmetter qarastyrylady.
Eksperıment bastalǵanǵa deıin qosymshany testileý rejıminde qoldanýǵa bolady, bul onyń fýnktsıonalyn aldyn-ala zertteýge kómektesedi, — delingen habarlamada.
«Amına» qosymshasyn tek bir resmı kózden — reseılik RuStore qosymshalar dúkeninen júkteı alasyz. Google Play nemese Apple App Store dúkeninen izdeý nátıje bermeıdi nemese kóshi-qon esebine qatysy joq beıresmı qoldanbalardy júkteýge ákeledi. Beıresmı derekkózderdi paıdalaný qaýipti, sebebi ol jeke basyn urlaýǵa nemese zııandy baǵdarlamany ornatýǵa ákelýi múmkin.
Aıta ketelik Máskeýdegi barlyq mektep MAH messendjerine kóshiriletini týraly jazǵan edik.