Máskeýde qazaqstandyq jaýyngerdiń súıegi tapsyryldy
ASTANA. KAZINFORM - Máskeýde Qazaqstannyń Reseıdegi Elshiliginde Uly Otan soǵysy jyldarynda qaza tapqan qazaqstandyq jaýyngerdiń súıegin tapsyrý rásimi ótti.
Ony ótken jyldyń kúzinde Novgorod oblysynda jergilikti «Medved» jáne «Nahodka» izdestirý jasaqtary tapqan. Jaýyngerdiń medalonynda saqtalǵan jazbalardyń arqasynda Semeı oblysynyń týmasy, 1908 jyly týǵan Orazǵalı Belýbaevtyń kim ekenin anyqtaý múmkin boldy. Osy ýaqytqa deıin jaýynger habar-osharsyz ketkenderdiń qatarynda bolǵan. Іzdestirýshilerdiń habarlaýynsha, ol 1943 jyly tamyzda Staraıa Rýssa qalasyn azat etý shaıqasynda qaza tapqan.
QR RF Elshiliginiń áskerı attashesi apparatynyń jáne «Maıdan Joly» men «Erlik-Dańq» izdestirý jasaqtarynyń kómegimen jaýyngerdiń týystary tabyldy. Jaqyn arada onyń súıekteri Otanyna jetkizilip, qurmetpen qaıta jerlenetin bolady.
Óz sózinde QR RF Elshisi Dáýren Abaev qaza tapqan ata-babalardy Qazaqstanda qurmetpen eske alatynyn atap ótip, izdeýshilerge ıgilikti isteri úshin rızashylyǵyn bildirdi.
«Sol kúnderdi eske alý bizdiń halyqtarymyzdy biriktiredi, kez kelgen synaqtar aldynda birlik pen yntymaqtastyqtyń kúshin eske salady. Búginde Qazaqstan beıbitshilik, tatý kórshilik qarym-qatynas jáne tarıhı shyndyqty qurmetteý qaǵıdattaryna adal bolyp qala beredi!» - dep atap ótti Elshi.
Óz tarapynan Novgorod oblysy gýbernatorynyń orynbasary Ilıa Malenko 1989 jyldan beri jyl saıyn óńirdegi Eske alý vahtalaryna qatysyp, óz úlesterin qosyp kele jatqan qazaqstandyq izdestirýshilerdiń jumysyn atap ótti.
- Olardyń eńbegi – Otanyna, týystary men jaqyndaryna qaıtarylǵan júzden astam esimder. Ortaq tarıhymyzdyń umytylmas betteri men Uly Jeńis bizdiń máńgi esimizde! – dep atap ótti ol.
Novgorodtyq «Nahodka» izdestirý jasaǵynyń komandıri Aleksandr Morzýnov tabylǵan sarbazdar medalonyn árdaıym tolqı otyryp ashatynyn aıtty.
- Jaýyngerdiń kim ekenin anyqtaı alǵan kezde, ol belgisizdikten oralady, ony máńgi eske alyp otyratyn otbasy, týystary, otany tabylady. Bizdiń, izdestirýshilerdiń isindegi eń mańyzdysy osy, – dedi Aleksandr Morzýnov.
Novgorodtyq «Medved» izdestirý jasaǵynyń komandıri Igor Týma ókinishke oraı, qaza tapqandardyń kim ekenin anyqtaý múmkin bolmaǵan jaǵdaılar da kezdesetinin aıtty, biraq osy qazaqstandyq jaýynger jaǵdaıynda sáti tústi: zamanaýı tehnologııalardyń kómegimen medalondaǵy jazbalar oqylyp, sodan keıin onyń týystary tabyldy.
Qaza tapqan jaýyngerge qatysty is-shara barysynda musylman dástúrlerine sáıkes janaza oqyldy.
Qaza tapqan sarbazdardyń súıekterin tabý boıynsha qazaqstandyq jáne reseılik izdestirý jasaqtarynyń birlesken jumysy jalǵasýda.
Osyǵan deıin Memleket basshysynyń «Uly Otan soǵysyndaǵy Jeńiske 80 jyl» medali týraly Jarlyqqa qol qoıǵany týraly habarladyq.