Máskeýde Qazaqstan-Reseı syrtqy vedomstvo basshylary keńesedi

NUR-SULTAN. QazAqparat – Máskeýde Qazaqstan-Reseı Syrtqy ister mınıstrlikteri arasynda kezekti konsýltatsııa ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Osy jyldyń 22 qyrkúıeginde Máskeý qalasynda QR Syrtqy ister mınıstriniń orynbasary Ermuhambet Qonyspaev pen RF Syrtqy ister mınıstriniń orynbasary Andreı Rýdenkonyń tóraǵalyǵymen kezekti Qazaqstan-Reseı Syrtqy ister mınıstrlikteri arasyndaǵy konsýltatsııalar ótedi. Іs-shara barysynda Qazaqstan-Reseı qatynastarynyń ózekti máselelerin, sondaı-aq kópjaqty birlestikter aıasyndaǵy ekijaqty ózara is-qımyldy talqylaý josparlanýda», - dedi SІM ókili vedomstvonyń apta saıyn ótetin brıfıngi barysynda jýrnalısterdiń saýalyna oraı.

Onyń atap ótýinshe, sol kúni Máskeý memlekettik halyqaralyq qatynastar ınstıtýtynda Qazaqstan men Reseı arasyndaǵy dıplomatııalyq qatynastardyń ornaǵanyna 30 jyl tolýyna arnalǵan halyqaralyq ǵylymı-tájirıbelik konferentsııa ótedi.

«Konferentsııany RF Syrtqy ister mınıstrliginiń Máskeý memlekettik halyqaralyq qatynastar ınstıtýty men QR Prezıdenti janyndaǵy Qazaqstannyń strategııalyq zertteýler ınstıtýty uıymdastyrady. Konferentsııa barysynda túrli salalardaǵy Qazaqstan-Reseı yntymaqtastyǵyn damytý máseleleri talqylanady», - dedi Aıbek Smadııarov.