Máskeýde Qazaqstan men Reseı tarıhshylarynyń konferentsııasy ótti

MÁSKEÝ. QazAqparat -Máskeýde Reseı ǵylym akademııasynyń ǵımaratynda «Eýrazııa júreginde: Reseı men Qazaqstan tarıh toǵysynda» halyqaralyq ǵylymı konferentsııasy ótti, dep habarlaıdy QazAqparat Reseıdegi Qazaqstan Elshiligine silteme jasap.

Konferentsııa Reseı men Qazaqstan tarıhshylarynyń birlesken jumys tobynyń jospary aıasynda uıymdastyryldy. Oǵan eýrazııalyq keńistiktiń tarıhyna mamandanǵan eki eldiń jetekshi ǵalymdary, túrkitanýshylar, arheologtar jáne muraǵatshylar qatysty.

Qazaqstan Respýblıkasy Bilim jáne ǵylym mınıstrligi Memleket tarıhy ınstıtýtynyń dırektory, tarıh ǵylymdarynyń doktory Búrkit Aıaǵan «Tarıh» ǵylymı-tanymdyq jýrnalynyń jańa nómirin tanystyrdy. Bul joly jýrnal «Reseı-Qazaqstan: Tarıhı kezeńder» jalpy ataýymen basylyp shyqty.

Basylymda Reseı men Qazaqstan tarıhynyń tamyry tereńde jatqan ártúrli aspektilerine basa nazar aýdarylǵan. Máskeý, Sankt-Peterbýrg, Nur-Sultan, Almaty, Oksford jáne basqa da qalalardaǵy jetekshi ǵylymı jáne bilim berý mekemeleriniń saıasattanýshylary, tarıhshylary, arheologtary, jetekshi ǵalymdary, shyǵystanýshylary men etnograftarynyń maqalalarynda Qazaqstan men Reseı qarym-qatynasy tarıhyn zertteý salasyndaǵy ózekti máseleler qarastyrylǵan.

Konferentsııa «Reseı beıbitshilik qory» halyqaralyq qoǵamdyq qory men A.Gorchakov atyndaǵy qoǵamdyq dıplomatııa qorynyń qoldaýymen ótkizildi.