Máskeýde Qazaqstan men Reseı qarym-qatynasynyń tarıhyna arnalǵan kórme ashyldy
MÁSKEÝ. QazAqparat - Búgin Máskeý qalasynda Memlekettik Dýmada eki eldiń dıplomatııalyq qatynasynyń ornaǵanyna 25 jyl tolýyna arnalǵan «Qazaqstan jáne Reseı ǵasyrlarǵa jalǵasqan dostyq!» kórmesiniń ashylýy boldy, dep habarlaıdy Májilistiń baspasóz qyzmeti.
Sharaǵa Májilis tóraǵasy Nurlan Nyǵmatýlın jáne Memlekettik Dýma spıkeri Vıacheslav Volodın qatysty. N. Nyǵmatýlın kórmeniń ashylýynda sóılegen sózinde: - Kórmeniń taqyryby da, oǵan qoıylǵan estelikter de Qazaqstan men Reseıdiń 25 jyl ishinde júrip ótken tarıhı jolynan syr shertedi. Bizdiń elderimizdiń basshylary Nursultan Ábishuly Nazarbaev pen Vladımır Vladımırovıch Pýtınniń salıqaly saıasatynyń arqasynda Qazaqstan men Reseı eń jaqyn, eń baýyrlas elder retinde búgingi kúni memleketaralyq yntymaqtastyqtyń jarqyn úlgisin kórsetip keledi. Bul bizdiń búgingi jáne bolashaq tabystarymyzdyń kepili. Osy jolda parlamentaralyq baılanystyń da róli óte zor,-dedi. Óz kezeginde Memlekettik Dýma tóraǵasy Vıacheslav Volodın, kórme - ortaq tarıhymyzdy eske alyp, bolashaqqa baılam jasaýdyń tamasha kórinisi ekenin atap ótti. - Bul sapar bizdiń áriptestik múmkindigimizdiń zor ekenin kórsetedi. Memlekettik Dýma men Parlament Májilisi arasyndaǵy yntymaqtastyq týraly palataaralyq parlamenttik komıssııanyń jumysy óte mańyzdy. Ásirese, bizdiń elderimiz basshylarynyń kelisimderin zańnamalyq turǵydan qamtamasyz etý jolynda ózektiligi joǵary,-dedi ol.
Kórmede Memlekettik Dýmanyń XX ǵasyr basyndaǵy birinshi jáne ekinshi shaqyrylym jumystarynyń muraǵattyq sýretteri qoıylǵan, ol jumystarǵa qazaq depýtattary da qatysqan bolatyn. Al ortaq tarıh týraly Ekinshi Dúnıejúzilik soǵysy, tyń ıgerý kezeńindegi erlikter, Baıqońyrdan ǵaryshqa alǵashqy sapar jaıyndaǵy estelik qoıylǵan. Sondaı-aq, kórmede eki memlekettiń táýelsizdiginiń alǵashqy jyldarynan ornaǵan qarym-qatynas jaıynda maǵlumat beretin estelikter bar. Ol sýretterden Elbasy Nursultan Nazarbaevtyń Reseı prezıdentterimen kezdesýleri kezinde mańyzdy strategııalyq qujattarǵa qol qoıyp jatqan sátterin, Eýrazııalyq ıntegratsııa týraly alǵash ret jarııa etken M.V. Lomonosov atyndaǵy MMÝ sóz sóılegen sátterin kórýge bolady. Sondaı-aq, táýelsiz Qazaqstannyń aıshyqty belgisi - Astanaǵa da aıryqsha nazar aýdarylǵan. Kórmege qoıylǵan Astananyń damý qarqyny men kóz tartar sulýlyǵynan syr shertetin sýretter kópshiliktiń qyzyǵýshylyǵyn týdyrdy.
