Máskeýde Qazaqstan men Reseı dostastyǵyna arnalǵan skver ashyldy
MÁSKEÝ. KAZINFORM - Skverdiń ashylý saltanatyna Qazaqstan men Reseıdiń resmı delegatsııalary, sondaı-aq óner qaıratkerleri qatysty, dep habarlaıdy Kazinform agenttiginiń menshikti tilshisi.
Saltanatty sharanyń ashylý rásiminde eki eldiń ánurany oınaldy.
Sharaǵa QR Mádenıet jáne aqparat mınıstri Aıda Balaeva, Qazaqstannyń Reseıdegi Elshisi Dáýren Abaev, RF Federatsııa keńesi basshysynyń orynbasary Andreı ıAtskın, konservatorııa dırektory Aleksandr Belıakov, opera ánshisi Marııa Mýdrıak, kompozıtor Rınat Gaısın, ánshi Álisher Karımov qatysty.
— Búgingi kúnniń sımvoldyq máni bar. Máskeýdiń ortalyǵynda Qazaqstan-Reseı dostyq skverin ashyp jatyrmyz. Bul Máskeýdiń kóptegen skverleriniń biri emes, bul kópjyldyq ózara syılastyq, shynaıy senim men eki memlekettiń basshylary Qasym-Jomart Toqaev pen Vladımır Pýtın arasyndaǵy dostyqtyń zańdy nátıjesi. Onyń sımvoldyq máni bizdiń halyqtarymyz arasyndaǵy máńgi dostyq, ýaqyt pen tarıhpen synalǵan, — dedi Aıda Balaeva ashylý saltanatynda.
Andreı ıAtskın atap ótkendeı, skver salý ıdeıasyn Máskeý qalasynyń úkimeti usyndy jáne ol Reseıdiń Syrtqy ister mınıstrligi tarapynan qoldaý tapty.
— Buny Reseı men dostas Qazaqstan arasyndaǵy tatý kórshilik jáne strategııalyq qatynastar aıqyndaıdy. Skverdiń basqa kezde emes, Qazaqstan Prezıdenti Qasym-Jomart Toqaevtyń Reseıge tarıhı, memlekettik sapary qarsańynda ashylýy erekshe nazar aýdarýǵa turarlyq. Erteń Kremlde Vladımır Pýtınmen kelissózder ótedi. Biz osy skverdiń halyqtarymyzdyń dostyǵy men ortaq tarıhynyń saqtalýyna qosylǵan úles bolady dep senemiz, — dedi ol.
Buǵan deıin Qasym-Jomart Toqaevtyń «Rossııskaıa gazeta» basylymynda jaryq kórgen maqalasynda halyqtarymyzdy jandy jipteı baılanystyratyn kópqyrly gýmanıtarlyq baılanystar erekshe nazar aýdarýǵa laıyqty ekeni aıtylǵan bolatyn. «Bıyl Astanada «Qazaqstan men Reseıdiń máńgi dostyq alleıasynyń» saltanatty túrde ashylýy eki el arasyndaǵy myǵym ári dostyq baılanystyń nyshanyna aınaldy. Al jaqyn ýaqytta Máskeýde «Qazaqstan–Reseı dostyǵy skveri» ashylmaq», — dep jazylǵan maqalada.