Máskeýde Qazaqstan Elshisiniń kýbogi úshin shaǵyn fýtboldan týrnır ótti

MÁSKEÝ. QazAqparat – Máskeýde Reseı Federatsııasyndaǵy Qazaqstan Respýblıkasy Elshisiniń kýbogi úshin shaǵyn fýtboldan jyl saıynǵy jastar týrnıri ótti, dep habarlaıdy «QazAqparat» HAA menshikti tilshisi.

Sharany Reseı Federatsııasyndaǵy «Halyqaralyq baǵdarlamalar ortalyǵy» AQ-nyń jáne «Qazalıans» stýdenttik birlestiginiń qoldaýymen Reseıdegi Qazaqstan Elshiligi uıymdastyrdy.

«Týrnır Qazaqstandaǵy Jastar jylyna jáne eki el arasyndaǵy, sonyń ishinde Máskeý qalasyndaǵy stýdentterdiń dostyq qarym-qatynasyn nyǵaıtýǵa arnaldy. Bıylǵy jyly sporttyq básekege bakalavrıat pen magıstratýrada bilim alyp júrgen stýdentter, astanalyq ártúrli joǵary oqý oryndarynan 12 komanda qatysty», - dedi Reseıdegi Qazaqstan Elshiliginiń keńesshisi Nurbolat Ańdasov.

Jarystyń qorytyndysy boıynsha birinshi oryndy M.Lomonosov atyndaǵy Máskeý memlekettik ýnıversıtetiniń, ekinshi oryndy G.Plehanov atyndaǵy Reseı ekonomıkalyq ýnıversıtetiniń komandalary, úshinshi oryndy «MISıS» Ulttyq zertteý tehnologııalyq ýnıversıtetiniń «Avangard» komandasy jeńip aldy.

Reseı Federatsııasyndaǵy «Halyqaralyq baǵdarlamalar ortalyǵy» AQ basshysy Ashat Ábdimyrzaev Qazaqstannyń dıplomatııalyq ókildigin «Bolashaq» baǵdarlamasynyń stıpendıanttaryna bergen múmkindigi úshin alǵys bildirdi.

Avtor: Narymbek Ismagýlov