Máskeýde Qazaq mádenıetiniń kúni ótkizildi
MÁSKEÝ. QazAqparat - Máskeýdegi Pıonerler saraıynda «Máskeý - meniń úıim» máskeýlik balalar-jasóspirimder ulttyq mádenıet festıvaliniń aıasynda kóktem merekesi - Naýryz meıramyna arnalǵan Qazaq mádenıetiniń kúni ótkizildi.
Mádenı sharany qazaq mádenıetiniń qoǵamdyq birlestikteri, qazaq stýdentteri jáne Reseıdegi qazaq dıasporasynyń uıymdary qalalyq mekemelermen birlesip uıymdastyrdy.
«Biz Naýryz merekesin qazaq mádenıetin ashyp kórsetetin jáne onyń sıpatyn tolyq beretindikten tańdap aldyq. Tabıǵattyń jańarýy, kóktemgi kóńil kúı, dostyń yqylasy - barlyǵy da osy merekege uıysqan. Ulttyq mádenıetter festıvaline oraı biz kóptegen halyqqa ortaq ári qazaq mádenıeti men dástúrin ashyp kórsetetin merekeni usynyp, ony qazaq halqy qalaı atap ótetinin jurtqa tamashalatqymyz keldi», - dedi ulttyq mádenıet kúnin uıymdastyrýshylar jas jubaılar Leran men Gúljanat Álmuhamedovtar.
Naýryz merekesi qarsańynda kıiz úıdiń ıntereri, qazaqtyń turmystyq zattary, qolóner buıymdarynan kórme jasalyp, qonaqtarǵa baýyrsaq, qurt jáne Naýryz kójeden dám tatqyzyldy.
Merekeni tamashalaýshylar «Toǵyz qumalaq», «Túımealý» jáne asyq oıyndarynan kúsh synasty. Qyz-kelinshekter arasynda ulttyq as máziri boıynsha «Otbasymyzdaǵy dástúrli taǵam» baıqaýy uıymdastyryldy.
Kelýshilerge Máskeý jastar festıvaliniń laýreattary «Altyn kúz» ánin shyrqap, «Shabyt» dombyrashylar ansambli kúı shertip, «Tomırıs» folklorlyq-horeografııalyq ansambli jáne «ıAksart» tobynyń ónerpazdary bı bılep berdi.
Kontsert aıaqtalǵan soń baǵdarlamaǵa qatysýshylar jáne balalar sýret baıqaýynyń jáne ulttyq taǵam ázirleý baıqaýynyń jeńimpazdary saltanatty túrde marapattaldy.
«Murager» máskeýlik qazaq mádenıeti qoǵamy» ÓQB prezıdenti Ernazar Nurıevtyń aıtýynsha, óskeleń urpaqqa halqymyzdyń tarıhy men dástúrine qyzyǵýshylyǵyn oıatý jáne yntalandyrý mańyzdy mindet bolyp tabylady.
