Máskeýde qazaq qaýymynyń aqsaqaldar keńesiniń basshysy Ákim Muhamedjanov dúnıeden ótti
MÁSKEÝ. 31 qańtar. QazAqparat /Narymbek Ysmaǵulov/ - Búgin 90 jasqa qaraǵan shaǵynda qazaq qaýmynyń aqsaqaldar keńesiniń basshysy, Uly Otan soǵysynyń ardageri, ІІD ardageri, mılıtsııa podpolkovnıgi Ákim Muhamedjanov dúnıeden ótti. Bul týraly RF-daǵy qazaq dıasporasynyń ókilderi habarlady.
«Á.Muhamedjanov Qyzylorda oblysynyń Shıeli aýdanynda týǵan. Ata-anasynan erte aıyrylyp, Tashkent qalasyndaǵy balalar úıinde tárbıelengen. Mektepti bitirgennen keıin Tashkent parovoz-vagon jóndeý zaýytynda slesar bolyp jumys jasady.
1942 jyly armııa qataryna shaqyryldy. 1949 jylǵa deıin ІІM áskerinde qyzmet etti. 1949-1970 jyldary qatardaǵy qyzmetkerden bólim bastyǵyna deıngi joldan ótip, Máskeý qalasynyń QІІB organdarynda qyzmet etti.
Ákim aǵa Qyzyl alańdaǵy sherýlerge qatysýshy. 1946 jyly Uly Otan soǵysyndaǵy Jeńistiń alǵashqy jyldyǵyndaǵy, ekinshi ret - 2005 jylǵy mamyrda Jeńistiń 60 jyldyǵyna arnalǵan áskerı sherýlerge qatysty.
Ol KSRO, Qazaqstan Respýblıkasy men Reseı Federatsııasynyń ordenderimen jáne medaldarymen marapattalǵan. Ómiriniń sońyna deıin Máskeýdegi qazaq qaýymynyń jáne ardagerler qozǵalysynyń jumystaryna belsene aralasty.
