Máskeýde Qaıdar Qumarbekulyna arnalǵan kitap jaryq kórdi
Dúnıejúzi qazaqtary qaýymdastyǵynyń qoldaýymen taralymǵa shyqqan atalmysh kitap Máskeý óńirlik «Qazaq tili» qoǵamy, Máskeý qalalyq qazaq ulttyq-mádenı avtonomııasy jáne Máskeý óńirlik «Murager» qoǵamy sekildi qoǵamdyq qurylymdardyń tikeleı qarjylyq qoldaýymen jaryqqa shyǵyp otyr.
Qazaqstannyń qurmetti jýrnalısi, fılologııa ǵylymdarynyń doktory, dıplomat Serikqalı Baımenshe bul kitapty jınaqtaýshy boldy.
Jastyq shaǵy men azamattyq eń belsendi jyldaryn Reseıde ótkizgen Qaıdar Qumarbekuly Qazaqstan men RF arasyndaǵy yntymaqtastyqty nyǵaıtýǵa, Reseıdegi qazaq dıasporasynyń basyn qosýǵa, halyqtardyń dástúrli dostyq baılanystaryn damytýǵa eleýli úles qosqan.
Bul kitapqa kezinde Nurtaı Ábiqaev pen Zaýytbek Turysbekov jáne Qazaqstannyń eńbek sińirgen qaıratkeri, QR Memlekettik syılyǵynyń laýreaty Sabıt Dosanov syndy el aǵalary pikir bildirgen.
«Eliniń jetistigi men jaqsylyǵyna qýana biletin, qolynan kelgenshe qazaq ultynyń qadir-qasıetin, óneri men mádenıetin óz ortasynda keńinen nasıhattap júrgen zertteýshi-ǵalymdardyń biri - Qaıdar Qumarbekov bolyp edi. Ol Máskeýde «Murager», «Qazaq tili» qoǵamdyq uıymdarynyń negizin salýshylardyń biri bolyp, ulttyq mádenıetti, ádet-ǵurypty jas urpaq zerdesine jetkizý jolynda sózimen de, isimen de úlesin qosqan aqsaqal bolatyn... Máskeý qazaqtarynyń, basqa da ult ókilderiniń Qaıdar aǵany ózgeshe jaqsy kóretinine kózim jetti. Sonyń bir dáleli –osy kitaptyń jaryq kórýi», - deıdi Dúnıejúzi qazaqtarynyń qaýymdastyǵy tóraǵasynyń orynbasary Arǵyn Ospanov.
Aıta ketsek, Dúnıejúzi qazaqtarynyń qaýymdastyǵy 1992 jyly qyrkúıekte ótken Dúnıejúzi qazaqtarynyń quryltaıynda qurylǵan. Negizgi maqsaty - Qazaqstannan tysqary jerlerde turyp jatqan aǵaıynmen, olardyń ulttyq-mádenı ortalyqtarymen jan-jaqty, tyǵyz baılanys ornatý.
