Máskeýde qatty jelden Kreml qorǵany zaqymdandy

MÁSKEÝ. TASS-QazAqparat – Máskeýdegi Kreml qorǵanynyń kerteshteri qatty jelden zaqymdandy. Bul týraly Federaldy kúzet qyzmetiniń baspasóz jáne qoǵammen baılanys bólimi rastady, dep habarlaıdy QazAqparat TASS agenttigine silteme jasap.

«Qorǵannyń Spassk munarasynan Senat munarasyna deıingi bóliginde qalpyna keltirý jumystary júrip jatqan, alaıda bul jumystar qatty jelge baılanysty ýaqytsha toqtatylǵan», - dedi bólim bastyǵy Denıs Sımonov.

Onyń aıtýynsha, qurylys aǵashy jartylaı qırap, qorǵan kerteshteri zaqymdanǵan.

«Adamdardan eshkim zardap shekken joq», - dedi Sımonov. Ol túsindirýdi osymen toqtatty.

Bul týraly erterek TASS-qa jedel qyzmetterden habar túsken bolatyn.

«Jeldiń saldarynan qurylys aǵashy qulap, bir ketreshke zaqym kelgen», - dedi agenttikke suqbat berýshi.

Máskeýlik TJM erterek qatty jel týraly eskertý jasaǵan edi.

TASS tilshisiniń aıtýynsha, qazirgi kezde Qyzyl alańǵa barar joldardyń barlyǵy jabylǵan. Atalǵan aýdandy baqylaýshy qyzmetkerlerdiń sózinshe, alań qıraýdyń saldarynan jabylǵan.

Kreml qorǵanyndaǵy zaqymdanǵan kerteshterdiń janynda birneshe qyzmetker bar, olar qırandylardy jınastyrýmen aınalysyp jatyr. Qorǵannyń bir kerteshi tolyǵymen joq.

Bul osyndaı birinshi jaǵdaı emes. Mysaly, 1998 jyly qatty jel Kreml aýmaǵyndaǵy 200 aǵashty qulatyp, qorǵannyń birneshe kerteshine zaqym keltirgen.

Al 2018 jyldyń sáýirinde Senat saraıy shatyrynyń bir bóligin ushyryp áketken.