Máskeýde iri kommýnaldyq apat boldy
ASTANA. QazAqparat - Reseı astanasynda 2 myńnan astam turǵyn úı jylý qubyryndaǵy apat saldarynan jylý men ystyq sýdan ajyratyldy. Olardy rezerv júıege qosý júrgizilip jatyr, dep habarlaıdy TASS agenttigi.
«Apattan soń 2 myńnan astam turǵyn úı jylý jáne ystyq sýsyz qaldy. Kommýnaldyq qyzmet mamandary olardy jylýmen qamtamasyz etýdiń rezervtik júıesine aýystyrdy, úılerdi qosý birtindep júrgizilýde», - dep túsindirdi agenttikke málimet berýshi.
Izmaılovo aýdanyndaǵy úıler jylýsyz qalǵan. «Sırenevoı býlvary jáne úshinshi Saıabaq kóshesindegi páterlerde jylý joq. Jylý batereıalary sýyq» - dedi turǵyndardyń biri. Golıanovo aýdanynyń turǵyndary ystyq sýmen jylýddyń joqtyǵyn aıtyp shaǵymdanyp otyr.
Sársenbi keshke Máskeý qalasynyń shyǵysyndaǵy Irkýtskaıa kóshesinde dıametri 800 mm jylý qubyry jarylǵan. Joǵary qysymdy ystyq sý beriletin qubyr apatynan adamdar zardap shegip, kúıip qalǵan.
